Skandali i kompanisë “Erzeni”/ Reagon artisti: Turp që keqpërdoren elementë të iso-polifonisë

28 Maj 2026, 19:08, Aktualitet CNA

Nazif Çela, artisti i mirënjohur i iso-polifornisë shqiptare, ka reaguar lidhur me skandalin e kompanisë “Erzeni”, që përmes një reklame për produktet që prodhon dhe tregton, ka keqpërdorur imazhin e këtyre grupeve që përfaqësojnë traditën e vendit.

SKANDAL/ Kompania shqiptare keqpërdor imazhin e grupit të iso-polifonisë
28 Maj, 18:33

Përmes një postimi në rrjetet sociale, Çela shprehet se është e turpshme dhe zhgënjyese që përdorën elementët e traditës pa asnjë lloj ndjeshmërie.

Artisti thekson se jo çdo ide mund të përdoret për marketing, veçanërisht si në rastin konkret, kur shkelet mbi kulturën, krenarinë dhe autenticitetin e Shqipërisë.

“Është zhgënjyese kur një kompani përdor elementë të trashëgimisë kulturore shqiptare vetëm për klikime dhe marketing banal, pa asnjë ndjeshmëri estetike, morale apo profesionale. Iso-polifonia labe nuk është dekor TikToku dhe as mjet për të shitur qumësht me figura lopësh të veshura me kostume popullore në mënyrë groteske. Ajo është një nga pasuritë më të rralla kulturore shqiptare, e njohur nga UNESCO, e lidhur me historinë, dhimbjen, krenarinë dhe identitetin e jugut të Shqipërisë. Ta reduktosh këtë trashëgimi në një reklamë të nivelit mediokër, me humor të sforcuar dhe estetikë artificiale, është jo vetëm mungesë profesionalizmi, por edhe mungesë respekti ndaj kulturës dhe publikut. Kur një kompani arrin në pikën që përdor simbolika kombëtare në mënyrë kaq të cekët, tregon se nuk ka as vizion kreativ, as standard etik, dhe as kuptim mbi përgjegjësinë që ka komunikimi publik”,-shprehet Çela.

Sipas Çelës, veç reklamës së shëmtuar, problemi qëndon te mentaliteti i gabuar, që e kthen folklorin në objekt talljeje.

“Problemi nuk është vetëm reklama “e shëmtuar”. Problemi është mentaliteti që qëndron pas saj: ideja se çdo gjë mund të përdoret për marketing, edhe kur deformon traditën dhe e kthen folklorin në karikaturë. Në vend që të promovonin kulturën shqiptare me dinjitet, autenticitet dhe finesë, kanë zgjedhur një qasje që duket amatore, e ekzagjeruar dhe pa identitet artistik. Një kompani serioze investon në kreativitet real, në mesazh, në estetikë dhe në respekt ndaj trashëgimisë. Këtu duket sikur e gjithë reklama është ndërtuar mbi sensacionin dhe absurditetin, pa menduar fare për ndikimin që krijon. Përdorimi i iso-polifonisë në këtë mënyrë nuk të bën “modern” apo “viral”; të bën të dukesh sikur nuk kupton as kulturën që po përdor dhe as publikun që po tenton të bindësh”,-thekson artisti.

Në fund, iso-polifonisti Çela nënvizon se ky rast i banalizimit të njërës prej krenarive shqiptare nuk duhet të kalojë pa u vënë re edhe nga organet kompetente.

“Është për të ardhur keq që në vend të një prezantimi dinjitoz të produkteve shqiptare, shohim përpjekje të dobëta për vëmendje, ku trashëgimia kulturore përdoret si sfond cirku. Kjo nuk është krenari kombëtare, është banalizim i saj. Për këtë denigrim publik të figurës së Nazif Çelës dhe përdorimin e papërshtatshëm të iso-polifonisë, do t’u drejtohemi organeve kompetente dhe institucioneve përgjegjëse për mbrojtjen e trashëgimisë kulturore dhe të drejtave të artistëve. TURP!”,-shkruan Çela./CNA