Dita e Flamurit/ Politika uron shqiptarët për 28 Nëntorin

28 Nëntor 2023, 10:11, Aktualitet CNA

Dita e Flamurit/ Politika uron shqiptarët për 28 Nëntorin

Foto ilustruese

Sot në Ditën e Flamurit, në Ditën e Pavarësisë së Shqipërisë, figura të politikës kanë uruar shqiptarët për 28 Nëntorin.

Kreu i Partisë së Lirisë, Ilir Meta, në mesazhin e tij të urimit shkruan:

"Gëzuar Ditën e Flamurit Kombëtar, simbolit që bashkon të gjithë shqiptarët, Gjergj Kastrioti Skënderbeun dhe Ismail Qemalin, Isa Boletinin dhe Adem Jasharin!

Nderimin më të thellë për Atin e Shqipërisë, themeluesin e shtetit tonë modern, Ismail Bej Vlorës dhe veprës së ndritur të shumë patriotëve të tjerë që përjetësuan 28 Nëntorin e vitit 1912!

Gëzuar Pavarësinë e Shqipërisë!"

Kryebashkiaku Erion Veliaj po ashtu ka uruar shqiptarët për 28 Nëntorin.

“Gëzuar vjetorin e Pavarësisë - Gëzuar Ditën e Flamurit Shqipëri. Flamujt shqiptarë që valëviten sot na kujtojnë sa të bekuar jemi që jetojmë në këto toka”.

Kryeparlamentarja Lindita Nikolla gjithashtu ka dhënë një mesazh urimi për shqiptarët.

“Sot 111-vjetori i shpalljes së Pavarësisë. Më 28 nëntor 1912, përpjekjet e patriotëve e shqiptarë, të mendjes e të pushkës, u kurorëzuan me sukses me shpalljen e pavarësisë dhe themelimin e shtetit shqiptar të pavarur. Pasi u ngrit nga Ismail Qemali në Vlorën e Flamurit, flamuri kuq e zi, deri atëherë shenja jonë kombëtare, u bë edhe simboli shtetëror i ???????? së pavarur.

Ja si e përshkruan këtë ngjarje madhore të historisë kombëtare, Ati Themelues i Shqipërisë së pavarur, Ismail Qemali:

'Plot me gaz e me lot ndër sy, nga mallëngjimi, pra, po dal këtu para jush që t’ju gëzoj me sihariqin e madh, se sot, edhe këtë minutë, Kongresi çpalli mëvehtësinë e Shqipërisë.' Dhe më poshtë, për të treguar se pavarësia, liria dhe integriteti i shtetit shqiptar, kërkon edhe sakrifica sublime, vijon:

'I drejtoj një lutje Zotit të Madh, që, bashkë me bekimet e Tij që i lipij të na japë për të qenë të denjë të kësaj dite, të pranojë që këtej e tutje të jem unë dëshmori më i parë i Atdheut.'

Fjalë inspiruese të një jete e vepre inspiruese në shërbim të atdheut! Sakrifica është shenja më domethënëse e patriotizmit.

Shqipëria është sot mes kombeve demokratike e të qytetëruara, anëtare e NATO-s, partnere e denjë e SHBA, që avancon me shpejtësi drejt familjes Europiane, në mbrojtje të paqes, lirisë, pavarësisë dhe integritetit të kombeve.

Një mbështetëse e vendosur e pavarësisë dhe fuqizimit të Kosovës në arenën ndërkombëtare".

Kreu i PD-së së vulës, Lulzim Basha, po ashtu ka dhënë urimin e tij në rrjetet sociale për shqiptarët.

“Gëzuar Ditën e Pavarësisë, Shqipëri! Uroj nga zemra të gjithë shqiptarët për festën e flamurit kuq e zi, simbolit tonë të shenjtë të lirisë dhe krenarisë kombëtare!”.

Më herët edhe kryeministri Edi Rama ka uruar shqiptarët anembanë për 111-vjetorin e Pavarësisë së Shqipërisë./ CNA