web counter
LEXO PA REKLAMA!

SHKARKO APP

App Store
Google Play

E fundit!

x

Detaje për anijet me mbetje toksike nga Porti i Durrësit/ Çfarë thonë autoritetet shqiptare dhe tajlandeze

13 Gusht 2024, 19:30, Aktualitet CNA

Detaje për anijet me mbetje toksike nga Porti i Durrësit/

Të tjera detaje kanë dalë në dritë nga anijet e nisura nga Porti i Durrësit drejt Tajlandës, të cilat dyshohet se përmbanin mbetje toksike.

Media ndërkombëtare “Bloomberg” ka kontaktuar Departamentin e Punëve Industriale të Tajlandës në lidhje me këtë çështje.

Departamenti i Punëve Industriale të Tajlandës i është përgjigjur se ka lidhur kontakt me autoritetet shqiptare në lidhje me ngarkesën prej 800 tonësh, në dy anije.

Sipas “Bloomberg”, autoritetet shqiptare janë shprehur se "nuk janë njoftuar dhe nuk kanë dhënë pëlqimin për këto dërgesa".

Dy anijet e nisura nga Porti i Durrësit rezultojnë të jenë të kompanisë “Maersk”.

Kjo e fundit, në një reagim ka deklaruar se dy nga anijet e saj të mallrave janë rezervuar nga një linjë tjetër detare për të transportuar kontejnerë me origjinë nga Shqipëria.

“Maersk” ka theksuar se nuk ka qenë në dijeni të përmbajtjes së kontejnerëve, përndryshe do të kishte refuzuar kërkesën e linjës tjetër.

“Për shkak të spekulimeve në lidhje me përmbajtjen e këtyre kontejnerëve, ‘Maersk’ do t'i dorëzojë kontejnerët në linjën e transportit që i ka rezervuar dhe është përgjegjëse për kontejnerët në fjalë”, tha zëdhënësja Summer Shi.

Kompanitë që kanë kontraktuar dy anijet për transportin e kontejnerëve nuk janë identifikuar ende. 

Duhet theksuar se Tajlanda dhe vendet e tjera të Azisë Juglindore janë përballur me transportin e paligjshëm të mbetjeve, duke nisur nga plastika e ndotur deri te mbetjet industriale dhe elektronike, të cilat mund të jenë të mbushura me toksina.

Sipas Konventës së Bazelit të Kombeve të Bashkuara, një pakt global i nënshkruar nga shumë ekonomi të zhvilluara, vendet duhet të japin pëlqimin që mbeturinat të shkojnë në rrugën e tyre.

Por Tajlanda nuk ka dhënë pëlqimin e saj për mbetjet e nisura nga Porti i Durrësit./ CNA





Lajmet e fundit nga