web counter
LEXO PA REKLAMA!

SHKARKO APP

App Store
Google Play

E fundit!

x

VIDEO/ Momenti i arrestimit të Lulzim Berishës, detaje nga ministria spanjolle

18 Dhjetor 2023, 15:33, Aktualitet CNA

VIDEO/ Momenti i arrestimit të Lulzim Berishës, detaje nga ministria

Ministria e Brendshme spanjolle ka dhënë detaje të reja nga arrestimi i Lulzim Berishës.

Në reagim thuhet se autoritetet shqiptare këmbëngulën në rëndësinë dhe prioritetin e gjetjes së këtij personi.

Ato bëjnë me dije se kërkimi u përqendrua në bregdetin Levantin, ku disa agjentë udhëtuan për javë të tëra.

Ato tregojnë si arritën të gjendej vendqëndrimi i të kërkuarit.

“Menjëherë pas kësaj, një apartament në San Juan de Alicante u gjet ku mund të fshihej i kërkuari. Në të njëjtin muaj dhjetor, ndërkohë që hetuesit kryenin vëzhgime diskrete në afërsi të urbanizimit, agjentët arritën të identifikonin një tjetër anëtar të organizatës që po përgatitej të zhvendoste të kërkuarin dhe me agjentët shfrytëzuan rastin për ta arrestuar atë”, thotë ministria.

Ministria e Brendshme spanjolle po ashtu në deklaratë thotë se i arrestuari ishte drejtues i një organizate kriminale, të cilës i atribuohen dhjetëra vrasje që nga viti 1998 si dhe përmend faktin që ai kërkohej për vrasjen e dy personave që u qëlluan në një qytet të Shqipërisë në vitin 2005.

“I arratisuri filloi aktivitetin e tij në organizatën kriminale që drejtonte në fillim të viteve ’90 dhe mori emrin e tij nga një nga qytetet më të rëndësishme të rajonit shqiptar, Durrësi, si simbol i kontrollit që kjo organizatë kishte arritur dhe falë saj do të ishte pozicionuar si eksportuesi kryesor i kokainës dhe armëve në vend. I arrestuari ishte në kërkim për vrasjen e dy personave, për larje hesapesh mes klaneve rivale që ndodhi në vitin 2005 dhe u zbardh 15 vjet më vonë”, thuhet në komunikatën e Ministrisë së Brendshme të Spanjës.

Në vitin 2012, ai u dënua së bashku me 16 anëtarë të organizatës së tij. Për katër prej tyre u vendos dënim i përjetshëm dhe 267 vjet burg për pjesën tjetër të anëtarëve, që akuzoheshin për vrasje, zhvatje dhe rrëmbim./ CNA





Lajmet e fundit nga