Protestë kundër fabrikës private/ Banorët e Libonikut në Korçë: Po na helmon, të merren masa

18 Dhjetor 2023, 15:05, Aktualitet CNA

Protestë kundër fabrikës private/ Banorët e Libonikut

Dhjetëra banorë në fshatin Libonik kanë protestuar sot për shqetësime, të cilat, sipas tyre, vijnë nga një subjekt, që përpunon vajra makinash të përdorura. Ky shqetësim, sipas tyre, ka një periudhë rreth 2-3-vjeçare, kohë kjo kur subjekti filloi aktivitetin e tij në këtë zonë.

Era e keqe, thonë banorët, është një shqetësim i përhershëm, ku në orët e pasdites është e vështirë edhe dalja në ambientet e fshatit apo edhe hapja e dritareve të banesave. Sipas tyre, ata nuk pranojnë që subjekti të vijojë aktivitetin, pasi hidrokarburet digjen shumë pranë banesave duke krijuar problematika edhe për shëndetin.

Kërkesa të shumta, sipas banorëve, u janë drejtuar institucioneve, por nuk është marrë parasysh shqetësimi që ata kanë ngritur. Sipas banorëve, ata kanë firmosur edhe peticione.

Julian Suljoti, administrator i këtij subjekti, thotë se institucionet përkatëse kanë ardhur vazhdimisht për inspektime dhe kontrolle për subjektin pas kërkesave të drejtuara nga banorët. Institucionet mjedisore kanë ardhur duke bërë kontrolle dokumentesh, kanë matur cilësinë e ajrit, ku ai ka rezultuar jo i dëmshëm. Sipas tij, ai ka respektuar çdo kriter duke bërë kontrollin e institucioneve çdo 3 muaj për matjen e ajrit. Fabrika, sipas Suljotit, ka teknologji moderne, me filtra për mbrojtjen e mjedisit. Ai pranon dhe faktin e aromës, por sipas tij ajo nuk është shqetësuese. Kjo ndodh, sipas administratorit, që banorët nuk janë të informuar dhe do të mundohen si subjekt t’i japin zgjidhje edhe për aromën, e cila shqetëson banorët e kësaj zone.

I kontaktuar me telefon inspektori i ARM-së në Korçë, Ardit Qirici, tha:

"Inspektorët kanë qenë për kontroll javën e kaluar në këtë subjekt. Nga kontrolli ka rezultuar se niveli i ndotjes nga puna e fabrikës ka qenë mbi normat e lejuara dhe për këtë arsye ndaj fabrikës është vendosur gjobë në masën 500 mijë lekë të rinj, si edhe i është pezulluar licenca deri në përmbushjen e kushteve për të ulur nivelin e ndotjes në ajër"./ CNA