E fundit!

10:38 Kulturë

Ndahet nga jeta mjeshtri i humorit, Todi Llupi

Ndahet nga jeta në moshën 78-vjeçare mjeshtri i humorit To...

Aeroporti i Vlorës/ Albcontrol prokuron disa shërbime, operimi nis në 2024

18 Dhjetor 2023, 13:56, Aktualitet CNA

Aeroporti i Vlorës

Albcontrol ka kërkuar marrjen e disa shërbimeve të lidhura me aeroportin e Vlorës, i cili sipas dokumenteve pritet të nisë operimin në fund të 2024.

Këtë të hënë në sistemin e Agjencisë së Prokurimit Publik me një fond limit 166 milionë lekë apo 1.6 milionë euro u njoftua kontrata “Krijimi i strukturave të hapësirës ajrore dhe hartimi i Procedurave të Fluturimit RNP dhe ILS për aeroportin e Vlorës, përfshirë matjet e pengesave (survey) dhe flight validation”.

Referuar specifikimeve teknike Albcontrol pranon se procedura lidhet me faktin që “një Aeroport i ri Ndërkombëtar që i shërben qytetit të Vlorës është planifikuar të nisë operimin në fund të vitit 2024. Aeroporti ka një kod referimi 4E. Drejtimet e pistës 13/31 janë të disponueshme për trafikun e mbërritjes dhe të nisjes”.

Sipas dokumenteve pista ka një gjatësi prej 3200 m dhe gjerësi 45 m. Një prag i zhvendosur do të zbatohet për të dy pistat duke zvogëluar gjatësinë e pistës së disponueshme për ulje në një drejtim.

“Procedurat e afrimit RNP për të dyja pistat do të sigurojnë afrim 3D preciz dhe jo preciz (SBAS CAT I, LNAV/VNAV), si dhe afrim 2D jo preciz (vetëm LP, LNAV).

Të dyja skajet e pistës do të plotësohen me procedurat konvencionale ILS CAT I për të shërbyer si rezervë e afrimeve kryesore RNP.

Modeli i propozuar për ofrimin e shërbimeve të trafikut ajror në aeroportin ndërkombëtar të Vlorës përshkruan një aerodrom të kontrolluar në një zonë kontrolli, të lidhur me rrjetin e rrugëve ajrore ATS nëpërmjet një hapësire ajrore të kontrolluar.

Në kuadër të operimeve të aeroportit ndërkombëtar të Vlorës janë parashikuar disa aktivitete që do të mbështesin hartimin e strukturave të hapësirës ajrore dhe procedurat e fluturimit instrumental. Objektivi i nivelit të lartë është zhvillimi i një Koncepti të plotë të Hapësirës Ajrore PBN për TMA-në e Vlorës dhe hartimi i integruar i procedurave të TMA-së, në përputhje me Rregulloren (BE) 2018/1048.

Një Ofrues i miratuar i Shërbimit të Hartimit të Procedurave të Fluturimit do të kontraktohet nga ALBCONTROL, Shërbimet e Lundrimit Ajror të Shqipërisë, për të kryer aktivitetet e mëposhtme në aeroportin e Vlorës:

a) hartimi i strukturave të hapësirës ajrore;

b) matja gjeodezike e pengesave;

c) hartimi i procedurave të afrimit RNP për të dy pistat;

d) hartimi i rrugëve standarde të ngritjes RNAV 1 SID dhe rrugëve standarde të mbërritjes RNAV 1 STAR për të dyja pistat;

e) hartimi i nisjeve gjithëdrejtuese (ODD) për të dyja pistat;

f) hartimi i procedurave të afrimit ILS për të dyja pistat;

g) validimi paraprak dhe me fluturim i procedurave të fluturimit instrumental;

h) vlerësimi i sigurisë së operimit për procedurat e reja të fluturimit instrumental;

i) trajnimi në vendin e punës i hartuesve të procedurave të fluturimit dhe gjeodetëve të rinj të punësuar”, thuhet te specifikimet teknike që shoqërojnë procedurën.

Aeroporti i Vlorës

Në fillim të vitit 2021 qeveria shpalli fituesin për koncesionin e aeroportit të Vlorës me një ofertë investimi 103 milionë euro ku bënin pjesë dy kompani Mabco Constructions SA e investitorit Behgjet Pacolli dhe ortaku turk YDA Insaat Sanayi ve Ticaret. Në dhjetor të 2022-shit Mabco mori kontrollin e plotë të aksioneve.

Qeveria ka aplikuar për këtë projekt garantimin e trafikut të munguar.

Sipas dokumenteve të bëra publike në atë kohë të ardhurat e garantuara në skenarin bazë për 10 vitet e para të operimit parashikohen 9.6 milionë euro në vitin e katërt, 10.3 në vitin e pestë, 11.2 për të gjashtë, 12.1 për të shtatë e kështu me radhë me një kulmim prej 18.6 milionë euro në vitin e trembëdhjetë nga nënshkrimi i kontratës.

Në total të ardhurat e garantuara duhet te jenë rreth 138 milionë euro. Kontrata parashikon që aeroporti të përfundojë në vitin 2024./Monitor