Plazhi përgjaket, rrugët mbushen me të vrarë/ Çuçi, ministri në krye të krimit

3 Gusht 2022, 08:31, Aktualitet CNA

Plazhi përgjaket, rrugët mbushen me të vrarë/

Ministri i Brendshëm, Bledi Çuçi

Dje, plazhi u përgjak, deti u ngjyros me gjakun e një 7-vjeçareje, e cila u godit me skaf nga oficeri i policisë, Arjan Tase.

Dora e krimit vinte nga policia dhe nuk është hera e parë që ndodh një gjë e tillë.

Por, është e disata herë që nuk mban përgjegjësi askush për kontigjentin kriminal që ka depërtuar në polici dhe na shfaqet çdo ditë, çdo natë, rrugëve, plazheve, me logon e oficerit të Policisë.

Vonë, mbrëmjen e së martës, i gjithë zinxhiri drejtues i Policisë së Kufirit dhe Migracionit Vlorë, u shkri, u shkarkua nga detyra.

Po fajtorët e vërtetë janë tjetërkund, janë në zyrat e Tiranës, janë ata që hedhin firmat dhe dalin e trumbetojnë një polici model.

Në këtë vend, që ka një Qeveri, të paktën zyrtarisht, një kryeministër dhe një Ministër të Brendshëm, askush nuk mban përgjegjësi.

Askush nuk ka faj në këtë vend, megjithëse, kryeministër është Edi Rama, Ministër i Brendshëm, Bledi Çuçi, kur të gjitha institucionet janë në duar të Partisë Socialiste dhe fare mirë mund të pastrojnë Policinë nga krimi.

Por, Bledi Çuçi duket se ka shkuar në krye të Ministrisë së Brendshme për t'i bërë çiçin rendit dhe sigurisë ashtu siç po ia bën.

Rrugët po përgjaken çdo ditë nga vrasjet mafioze, droga po bën kërdinë me bekimin e policisë, plazhet po përgjaken po nga dora e policisë dhe Bledi Çuçi nuk paska faj.

Me 25 korrik, në një takim me drejtuesit e Policisë së Shtetit përgjatë zonave të bregdetit, i njëjti Çuç që sot nuk mban përgjegjësi për vrasjen makabre të 7-vjeçares nga oficeri i policisë, siguronte qytetarët për pushime të qeta.

Ose më saktë i gënjente qytetarët për pushime të qeta. Plazhi i Potamit është skuqur nga gjaku i 7-vjeçares, por fytyra e ministrit Çuçi duket se as nuk është skuqur dhe as nuk është zverdhur.

“Asnjë tolerancë për subjektet që nuk respektojnë orarin e lejuar të muzikës gjatë natës, asnjë tolerancë për këdo që rrezikon pushuesit me motorë uji duke thyer në mënyrë flagrante kordonët e sigurisë. Do të përgjigjet personalisht çdo drejtues e punonjës policie që mbyll sytë para paligjshmërisë ose që aplikon standarde të dyfishta”, deklaronte Çuçi.

Në një një vend demokratik, normal, kur krimi nuk ka kapur Policinë, kur Çuçi nuk ka çfarë të fshehë, Ministri i Brendshëm duhej të kishte dhënë dorëheqjen, në mos do të ishte shkarkuar.

Por, këta vrasin, dhe shtiren të pafajshëm, Çuçi e çuçat e tjerë flenë të qetë, në komoditet, pasi fëmijët e tyre i kanë të siguruar, nuk i vret askush./CNA.al