Baba Mondi, në Vatikan/ Mesazhi i Papa Françeskut: Marrëdhëniet me komunitetin Bektashi, pasuri për të gjithë ne

16 Janar 2025, 14:22, Aktualitet CNA

Takim historik i Atit të Shenjtë Papa Françesku me Kryegjyshin Botëror Shenjtërinë e Tij Haxhi Dede Edmon Brahimaj.

Sot paradite në një audiencë në Pallatin Apostolik në Vatikan, Papa priti Kryegjyshin Botëror Baba Mondi, së bashku me delegacionin.

Pasi uroi me përzemërsi mirëseardhjen e tij, Papa mes tjerash tha se "sa herë që liderët fetarë takohen, bashkohen, në frymën e respektit të ndërsjellë, dhe angazhohen përmes dialogut, mirëkuptimit të ndërsjellë dhe bashkëpunimit, ripërtërihet e konfirmohet shpresa jonë për një botë më të mirë e më të drejtë", për çka ka kaq shumë nevojë koha jonë".

Papa më tej kujtoi "marrëdhëniet miqësore ndërmjet Kishës katolike dhe komunitetit Bektashi, si pasuri për të gjithë ne. Dhe kam besimin se këto lidhje do të forcohen gjithnjë e më shumë në shërbim të vëllazërimit e të bashkëjetesës paqësore".

Papa theksoi edhe disa nga momentet e rëndësishme që kanë karakterizuar marrëdhëniet ndërmjet komunitetit Bektashi me Kishën Katolike. Këtu Papa nënvizoi se "marrëdhëniet vëllazërore që shërbejnë si urë që ndërton pajtim dhe jo grindje, paqe e jo ndarje fetare, si brenda vendit por edhe në marrëdhëniet midis Lindjes dhe Perëndimit. Me këtë mënyrë nderohet e ardhmja e shoqërisë njerëzore.

Kryegjyshi Botëror, Shenjtëria e tij duke falënderuar për pritjen e ngrohtë, propozoi që të nënshkruaj së bashku me Atin e Shenjtë Françesku dokumentin mbi vëllazërimin njerëzor të Abu Dabit. Çka Papa e vlerësoi dhe pranoi me shumë dashuri, duke kujtuar rolin që ka luajtur komuniteti Bektashi në histori dhe në marrëdhëniet me komunitetet e tjera fetare.

Në këtë kontekst, Kryegjyshi e informoi Papën për nismën e kryeministrit të Shqipërisë Rama për krijimin e Shtetit të Ri Sovran Bektashi, i cili do të jetë një shtet i moderuar islam, brenda shoqërisë perëndimore. 'Kjo është një nismë e bukur të cilën unë e bekoj', tha Papa.

Në shenjë mirënjohjeje e devocionit të thellë, Kryegjyshi Botëror Shenjtëria e tij Baba Edmond Brahimaj i dhuroi Papës shallin e gjelbër, simbol të Bektashizmit.

Takimi u mbyll me një përqafim vëllazëror, në vazhdë të të cilit u shkëmbyen dhuratat.

Vizita e Kryegjyshit Botëror vazhdoi me takime në Dikasterin e Vatikanit për dialogun ndër fetar dhe me një vizitë vëllazërore në Radio Vatikan.

Fjala e plotë e Papa Françeskut

I dashur vëlla Haxhi Baba Edmond Brahimaj,

Shkëlqesi,

te dashur miq,

Unë e mirëpres përzemërsisht këtë delegacion të shquar nga Shqipëria dhe në veçanti nga Komuniteti Bektashi dhe falënderoj Dikasterin për Dialogun Ndërfetar që bëri të mundur këtë takim.

Sa herë që liderët fetarë bashkohen në frymën e vlerësimit të ndërsjellë dhe angazhohen për një kulturë takimi, përmes dialogut, mirëkuptimit dhe bashkëpunimit të ndërsjellë, shpresa jonë për një botë më të mirë dhe më të drejtë ripërtërihet dhe konfirmohet. Sa shumë ka nevojë koha jonë për një shpresë të tillë!

Marrëdhëniet miqësore mes Kishës Katolike, Shqipërisë dhe Komunitetit Bektashi janë të mira për të gjithë ne dhe kam besimin se këto lidhje do të forcohen gjithnjë e më shumë në shërbim të vëllazërisë dhe bashkëjetesës paqësore mes popujve.

Në këto kohë të vështira, të gjithë jemi të thirrur të hedhim poshtë logjikën e dhunës dhe mosmarrëveshjes, të përqafojmë atë të takimit, miqësisë dhe bashkëpunimit në kërkim të së mirës së përbashkët.

Në fakt, bindjet tona fetare na ndihmojnë të përqafojmë më qartë këto vlera themelore, specifike për njerëzimin tonë të përbashkët, "duke lejuar zërat e ndryshëm së bashku të formojnë një këngë fisnike dhe harmonike" (Letra Enciklike Fratelli tutti, 283).

Në këtë drejtim, mendoj me mirënjohje për momentet e shumta të takimeve vëllazërore që kanë ndodhur mes komunitetit bektashi dhe kishës katolike, si Lutja për Paqe në Ballkan në vitin 1993 dhe Dita Botërore e Lutjes për Paqe në Asizi në 2011.

Përurimi i tempullit të Bektashinjve në Tiranë në vitin 2015 ishte një moment veçanërisht i frytshëm afrimi dhe miqësie. Jam i bindur se Komuniteti Bektashi, së bashku me myslimanët, të krishterët dhe të gjithë besimtarët e tjerë të pranishëm në Shqipëri, mund të shërbejë si një urë pajtimi dhe pasurimi reciprok jo vetëm brenda vendit tuaj, por edhe midis Lindjes dhe Perëndimit.

Pavarësisht sfidave të së tashmes, dialogu ndërfetar ka një rol unik në ndërtimin e një të ardhmeje të pajtimit, drejtësisë dhe paqes që njerëzit e botës, e veçanërisht të rinjtë, e dëshirojnë me zjarr.

Të dashur miq, ju siguroj për lutjet dhe bekimin tim për punën tuaj të rëndësishme dhe për të gjithë popullin e dashur shqiptar. Dhe ju lutem gjithashtu të luteni për mua. faleminderit.