Alibeaj ka emër për Presidentin, por e mban sekret!

18 Maj 2022, 12:01, Politikë CNA

Po kthehet në qesharake e ashtuquajtura negociatë që Alibeaj po kërkon që të zhvillojë për emrat e kandiaturave për President.

Në të gjitha deklarimet publike të tri javëve të fundit, lideri Alibeaj përsërit të njëjtat deklarime dhe formula qesharake që zbërthejnë më shumë delirin sesa sensin politik me të cilin arsyeton Alibeaj.

Si fillim kërkoi që të uleshin për të përcaktuar kriteret, por pa artikuluar kriteret! Thjesht u mblodh që të thoshte që duhet të mblidheshin një ditë tjetër për të përcaktuar kriteret!

cna news, cna lajme, lajme cna, lajme flash cna, cna.al, cna lajme politike, Pastaj u mbyll në shtëpi që të hartonte një draft mekanizmi propozimesh, (jo kriteresh), me të cilin sugjeronte që praktikisht PS-ja të hiqte dorë fare nga e drejta për të propozuar kandidatura për President dhe të pranonte pa kushte e të zgjidhte nga lista “Alibeaj”.

Sigurisht që ai draft aspak politik, ishte i paparanueshëm për mazhorancën.

Pastaj pranoi të rivazhdonte takimet, por kur u takuan, kërkoi që takimi të shtyhej pasi donte kamerat prezent sepse ai negociatën e bën vetëm me kamera. Enkelejdi do që të gjithë shqiptarët të dëgjojnë live budallallëqet që thotë.

Nuk është çudi që sorollatja e Alibeajt arriti të nervozonte edhe Grida Dumën, e cila shquhet për talentin që ka në formulimin e fjalive pa kuptim. Çuditërisht Grida kur humbka durimin qenka më e qartë.

Grida nuk ishte dakord me Alibeajn që duhet të fillohej me kriteret.

Grida tha: Nxjerrim emrin. Këta po të duan ta pranojnë po të duan ta votojnë kundër.

Dhe iku Grida!

Mbeti Alibeaj që insiston në formulimin e kritereve, por nuk thotë se cilin apo cilët janë personalitetet që ka në kokë Enkelejdi dhe që i plotësokan ato kritere.

Mbase do të ishte më kollaj që të thoshte emrat?

Kështu, të gjithë mund t’i lexojnë edhe kriteret e Enkelejdit, pa u hallakatur kot me javë të tëra në pritje të listës “Alibeaj”.

Sorollatja e Alibeajt i ngjan sorollatjes së të njëjtit gjatë komisionit të famshëm hetimor, kur në cilësinë e kryetarit të Komisionit, Alibeaj nuk pranonte të lejonte mazhorancën të votonte, megjithëse vetë nuk i kishte votat për të marrë asnjë vendim.

Me të njëjtën mungesë logjike jo vetëm juridike tashmë, por edhe politike, Enkeldejdi pretendon që të pengojë mazhorancën që të votojë për Presidentin e ri.

Enkelejdi edhe sot erdhi vërdallë.

Dhe nuk nxori asnjë emër.

Me sa duket emrin e kandidaturës për President e ka sekret.

Tregon kriteret që të gjithë të kuptojnë emrin?

Kur mund të ishte më e thjeshtë! Të tregojë emrin që të gjithë të kuptojmë kriterin!

Nëse i referohemi dështimit historik të Komisionit Hetimor të udhëhequr nga Enkelejdi, me gjasë atë emër nuk do ta marrim vesh kurrë. Ai emër do të “vdesë” si sekret i Enkelejdit!

Lideri Alibeaj nuk ka asnjë emër, sepse nuk ka 20 firma që i duhen për atë emër!

Ndaj vjen vërdallë në lidershipin e vet që shkon nga karrigia e vet deri te laptopi i shtëpisë së vet.

Aq të shkurtër e ka takatin sa nuk arrin as të printojë një copë letër me një emër kandidati.

Enkelejdit nuk i bindet as Alibeaj që të firmosë një emër kandidati për President.

Prandaj do që raundet për Presidentin t’i djegë duke na ofruar këtë “suspancë” të tipit “Për-puthen”./CNA.al