E fundit!

22:46 Aktualitet

Deklarata e Paunoviç/ Sveçla: Nuk është personale, reflekton qëndrim të Serbisë

Ministri i Brendshëm në Kosovë, Xhelal Sveçla ka folur mbr...

Dhuna dhe abuzimi i fëmijëve/ Erisa Xhixho dorëzon në Parlament projekt-ligjin për Regjistrin e Krimeve Seksuale

6 Nëntor 2021, 08:21, Aktualitet CNA

Deputetja e LSI-së Erisa Xhixho ka reaguar për abuzimin e 6-vjeçares nga babai i saj, lajm i cili tronditi opinionin publik.

Xhixho shprehet se ngjarja është shokuese dhe se raste të tilla duhet trajtuar me seriozitet, ndërsa ka kujtuar edhe rastin e rëndë të përdhunimit që në moshën 12-vjeçare të një tjetër vajze në jug të vendit nga një familjar mbi 50-vjeçar.

Ajo njofton se ka dorëzuar në Kuvend projekt-ligjin për Regjistrin e Krimeve Seksuale ne bashkepunim me CRCA/ECPAT Shqipëri, ndërsa thekson se miratimi i tij zgjidh një herë e mirë regjistrimin e çdo grabitqari seksual dhe mbrojtjen e femijëve e grave nga dhuna seksuale!

Reagimi i plotë:

E tronditur pas ngjarjeve ulëritese të fundit, dhunimit shtazor të vajzës 6-vjeçare nga i ati dhe përdhunimit që në moshën 12-vjeçare të një tjetër vajze në Jug të vendit nga një familjar mbi 50-vjeçar. E pafjalë si grua, e shokuar si nënë, por plot nerv për të bashkuar zërat, për ta ndryshuar këtë realitet.

Raste të tilla, fatkeqësisht jo të izoluara duhen trajtuar siç duhet. Dhuna ndaj femijeve e grave sipas studimit 10-vjeçar të CRCA/ECPAT Shqipëri ?Krimet Seksuale ndaj Fëmijëve dhe Grave në Shqipëri?, gjeti se të paktën 65 përqind e krimeve seksuale kryen ndaj fëmijëve, përgjithësisht fëmijë vajza.

Dje dorëzova në Kuvend projekt-ligjin për Regjistrin e Krimeve Seksuale ne bashkepunim me CRCA/ECPAT Shqipëri. Miratimi i tij zgjidh një herë e mirë regjistrimin e çdo grabitqari seksual dhe mbrojtjen e femijëve e grave nga dhuna seksuale!

Krijimin e Regjistrit Kombëtar për të Dënuarit për Krime Seksuale i cili duhet të jetë një instrument i shtetit shqiptar për të luftuar dhe parandaluar krimet seksuale.

Hartimi i këtij projektligji është diktuar nga nevoja për krijimin e një mekanizmi ligjor-institucional efektiv, parandalues për mbrojtjen e fëmijëve, të rinjve, grave dhe çdo viktime seksuale të mundshme nga grabitqarët seksualë.

Projekt-ligji ka për qëllim inkurajimin dhe përgatitjen e organeve kompetente shtetërore për të mbrojtur fëmijët, të rinjtë, gratë dhe çdo individ nga dhuna dhe shfrytëzimi seksual, vepra penale që prekin jo vetëm dinjitetin e individit, por edhe shkaktojnë pasoja të rënda në funksionimin normal të qenies njerëzore, duke siguruar që Regjistri të jetë një mjet efektiv për të identifikuar vendodhjen e të dënuarëve për krime seksuale dhe monitorimin i aktivitetit të tyre.

Ky eshte vetëm një hap i parë, që pret angazhimin e gjithë aktorëve të shoqërisë civile, qytetarët, median, kolegëve deputetë, akademikët. Të gjithë që mund të kontribuojnë me mendime sugjerime për të miratuar nje ligj që i shërben mbrojtjes së fëmijëve, grave nga dhunuesit seksualë.

Zëri ynë duhet sot, më i fortë se kurrë. E nesëmja është vonë dhe nuk do na e falë heshtjen.