LEXO PA REKLAMA!

SHKARKO APP

Nga Arian Galdini/ Lëvizja e Re është tashmë këtu

23 Tetor 2021, 08:37, Politikë CNA
Nga Arian Galdini/ Lëvizja e Re është tashmë këtu

Në dt 24 tetor mbushim 1 vit LRE.

1 vit më parë e pyesja veten se nëse diçka e re do të lindë, a do te jetë ndryshe kësaj radhe?  A janë krijuar kushtet për një Lëvizje të re politike?

Asokohe, nuk isha i sigurtë për përgjigjen.  Isha plot mëdyshje, ankth, frikëra, pasiguri.

Ndaj edhe kur i hyra kësaj sfide, më shumë luftoja me veten për ti mundur frikërat dhe mëdyshjet e pasiguritë e mia, sesa me botën.

Dhe ja ku erdhëm sot këtu. LRE – Lëvizja e Re lindi.

LDE – Partia për Liri, Demokraci dhe Etikë u transformua dhe rrafshi i komunikimit dhe përfshirjes u bë më i gjerë, më i thellë dhe më kërkues.

Transformimi i LDE solli LRE.  LRE është tashmë prej 1 viti, këtu. Ndaj pyetja e radhës që i bëjmë ne vetes është:  A kemi ne qëllimshmëri në gjërat që bëjmë?

Dhe përgjigja do të ishte e doradorshme: Po. Sigurisht që po.  E kush nuk ka. Dallimi mes nesh dhe atyre të cilët do të perballim e konkurojmë është tek qëllimshmëria që flet me shembull jetësor. Jo me fjalë, por me shembull jetësor.

Shembujt e jetëve tona si nismëtarë, drejtues e aktivistë të Së resë, të LRE – Lëvizjes së Re, flasin për qëllimshmëri të mbara që kanë të shenjtë dinjitetin njerëzor.

Ne nuk bëjmë gjithçka për hir të suksesit, përfitimit, e arritjeve personale. Ne bëjmë vetëm gjërat e përshkruara qartë në Hartën e Dinjitetit Njerëzor.

Ne nuk zhbëjmë dinjitetin tonë e as të të tjerëve. Ne përpiqemi tia dalim mbanë me zotësi, talent e guxim. Nuk e kemi nisur Të renë, që të kapim veten.

Ne e kemi nisur Të renë që të kapim kohën e humbur të këtij vendi.  Ne nuk kemi nevojë për të bërë Politikë për hir të Politikës që të kapim veten, sepse së paku ne nismëtarët e Së resë, LRE – Lëvizjes së Re,  jemi njerëz të realizuar e arrirë në punët, familjet e profesionet tona.

Shumica prej nesh nuk janë paguar kurrë me taksat e qytetarëve apo me rroga partie a politike.  Edhe ata ndër ne që kanë punuar si buxhetorë në Shtet, janë shembuj të mrekullueshëm të mirëadministrimit, ekspertizës, ndershmërisë dhe integritetit.

Shumica prej nesh kanë punuar e ndërtuar gjithçka nga e para, me zotësi, talent e ndershmëri. Nuk jemi të pakënaqur nga Partitë e mëdha a të vogla, sepse kurrë nuk jemi varur prej tyre e as nuk kemi ndërtuar prej tyre.

Nuk kemi vjelur e as shfrytëzuar e as përfituar kurrë nga asnjë Parti e madhe apo e vogël. Aktivizmin tonë, e këtu po flas për ata që kanë qenë aktivë në Parti të tjera, e kemi patur të sinqertë, idealist dhe të ndershëm.

Kësisoj, sot që nisur këtë udhë e kemi ndërmarë këtë nismë për të ngritur e bashkuar një alternativë të re politike, një shtëpi tonën të bashkuar politike, synimet dhe qëllimet i kemi të qarta.

Duam të bëjmë betejën finale për ti ringjallur shpresën këtij vendi. Po jetojmë e degradojmë në epokën e pacipësisë, në kohë e ditë pashpresësie kur në mendjen e çdo shqiptari, pra edhe në mendjet tona, po vlon mendimi për ta braktisur këtë vend.

Ne para se të dorëzohemi e të vendosim që ta braktisim këtë vend, duam e duhet të bëjmë një betejë finale me Sistemin e të Ligjve që po e mbajnë peng e po e plaçkisin këtë vend.

Kjo do të jetë si betejë finale. Duhet bërë si betejë finale për ta lëvizur këtë vend drejt së mirës, para se ta braktisin gjithë të mirët.

E ne jemi njerëzit e duhur, ne jemi E reja e duhur, ne jemi alternativa e duhur për ta bërë këtë betejë finale. Ne kemi dhënë prova se ne nuk e vjelim, nuk e vjedhim, nuk e plaçkisim këtë vend.

Më parë se ta vjedhim, ne më mirë ikim nga ky vend. Nëse qëndrojmë e luftojmë këtu, ne do ta ndërtojmë këtë vend. Por për ta vjedhur e plaçkitur, kurrë.

Nuk jemi Parti pushteti, e as Parti deputeti. Nuk kemi ndërmarë një nismë politike për qëllime private, e as per për përfitime personale.

E reja eshte e do të jetë Partia e qytetarëve shqiptarë që duan e janë të vendosur që të bëjnë një betejë finale përballë e duke konkuruar Sistemin e të Ligjve me të gjitha palët politike bashkë e veç e veç.

Shqipëria e meriton një alternativë të dlirë të ringjalljes së shpresës. Shqipëria e meriton një alternativë të njerëzve të mirë, të virtytshëm dhe të talentuar, që nuk janë paguar kurrë as nga taksapaguesit, as nga politika e as nga partitë.

Njerëzit e mirë që nuk varen nga sistemi politik dhe ekonomik i të Ligjve Majtas e Djathtas, duhet të bëhen bashkë që ti ngrenë lart e bashkojnë kryet dhe zërat e shqiptarëve.

Nuk jemi Parti pushteti e as Parti deputeti. Jemi Parti dinjiteti. Kjo do të jetë beteja jonë finale për dinjitet e shpresë në Shqipëri./CNA.al

Lajmet e fundit nga