LEXO PA REKLAMA!

SHKARKO APP

App Store
Google Play

U arrestua për shpërdorim detyre/ Prokuroria ngre të tjera dyshime për ish shefin e Kadastrës në Vlorë

21 Tetor 2021, 15:03, Aktualitet CNA
U arrestua për shpërdorim detyre/ Prokuroria ngre të tjera

Ish shefi i Kadastrës në Vlorë Klodian Troci u arrestua pak ditë më parë me akuzën për shpërdorim detyre.

Prokuroria e Vlorës ka sekuestruar një sërë dosjesh voluminoze dhe po kryen hetimet, ndërsa ka ngritur dyshime të forta se Troci mund të ketë falsifikuar të tjera dosje të pronave në fshatrat Dhërmi dhe Himarë.

Sipas institucionit të akuzës, dyshimet janë se ai në bashkëpunim me zyrtarë dhe ish zyrtarë të tjerë, ka ndërhyrë në dokumente përmes falsifikimit.

Klodian Troci u prangos pak ditë pasi dha dorëheqjen nga detyra dhe gjatë kontrollit në shtëpi, atij iu gjet dhe sekuestrua një shumë prej 60 mijë eurosh. Gjatë seancës për caktimin e masës së sigurisë, ish shefi i kadastrës deklaroi se paratë janë të vëllait që bën ndërtime, por prokuroria ka dyshime se ato janë para që rrjedhin nga burime të paligjshme.

Sipas dosjes së Prokurorisë, që nga viti 2019 deri në vitin 2021, Klodian Troçi, Bardhyl Gjika dhe specialisti në drejtorinë e administrimit të tokave, Kreshnik Mino kanë bashkëpunuar duke falsifikuar dokumente arkivorë të pronësisë, si tapi tokash apo përdorimi për banorë të fshatrave Himarë e Dhërmi, etj. të Bashkisë Himarë.

Gjika dhe Troci aktualisht ndodhen në burg, Kreshnik Mino po hetohet nën masën e detyrimit për paraqitje, ndërsa Spiro Duni ndodhet në spital për shkak të gjendjes shëndetësore./CNA.al

Lajmet e fundit nga