web counter
LEXO PA REKLAMA!

SHKARKO APP

App Store
Google Play

E fundit!

x

Britania pritet të miratojë vaksinën AstraZeneca

28 Dhjetor 2020, 14:21, Kosova & Bota CNA

Autoritetet britanike pritet të miratojnë vaksinën kundër koronavirusit të kompanisë AstraZeneca këtë javë dhe kreu i kompanisë tha se ajo do të jetë po aq efektive kundër virusit sa vaksinat e kompanive Pfizer-BioNTech dhe Moderna.

Shefi ekzekutiv i AstraZenekës, Pascal Soriot tha për gazetën ?Sunday Times? se kompania e ka “zbuluar formulën fituese që e rrit efektshmërinë pas dy dozave deri afër nivelit që kanë treguar vaksinat e tjera”.

Ai shtoi se ai beson se vaksina e kompanisë së tij do të jetë gjithashtu efektive kundër variantit të ri të virusit, i cili është më ngjitës dhe po shkakton shqetësim në të gjithë botën.

Nëse miratohet, vaksina e kompanisë AstraZeneca do të bëhet vaksina e pestë që do të përdoret në luftën kundër koronavirusit. Testet e hershme treguan se vaksina ishte 70 përqind efektive në parandalimin e sëmundjes, krahasuar me nivelin e efektshmërisë prej 95 përqind të raportuar nga Pfizer dhe partneri i saj gjerman BioNTech. Rusia dhe Kina gjithashtu kanë vaksinat e tyre.

Vaksina e fundit në horizont vjen ndërsa numri i infeksioneve me Covid-19 në botë arriti në 80.8 milionë, ndërsa ai i vdekjeve në 1.7 milionë, sipas të dhënave të Universitetit Johns Hopkins.

Në Shtetet e Bashkuara, 19 milionë njerëz janë infektuar me Covid-19 dhe më shumë se 333,000 njërëz të tjerë kanë vdekur nga kjo sëmundje.

Seuli zgjat masën e ndalimit të fluturimeve nga Britania

Koreja e Jugut njoftoi të hënën se do të zgjasë masën e ndalimit të fluturimeve direkte nga Britania deri më 7 janar pasi tre persona që sapo kishin hyrë në vend rezultuan pozitiv me variantin e ri të COVID-19 që u identifikua për herë të parë në Britani.

Agjencia e Kontrollit dhe Parandalimit të Sëmundjeve në Korenë e Jugut tha se tre personat kishin arritur në vend më 22 dhjetor pas një fluturimi nga Londra, duke i bërë ato rastet e para të njohura me variantin e ri të koronavirusit në Korenë e Jugut.

Japonia, e cila raportoi rastin e saj të parë të këtij lloji të Covid-19, ndaloi hyrjen e të gjithë të huajve jo-rezidentë në vend nga mesnata e së hënës deri në fund të janarit. Duke filluar nga e hëna, autoritetet amerikane thanë se udhëtarët që vijnë nga Britania duhet të kenë rezultate negative nga testet për koronavirus 72 orë para nisjes. Ndërkohë, pandemia ka detyruar autoritetet në Australi që të ndalojnë pjesëmarrjen e njerëzve në festimet më ikonike të Vitit të Ri në botë.

Kryeministrja e Uellsit të Ri Jugor, Gladys Berejiklian njoftoi të hënën se Porti i Sidneit do të jetë i mbyllur për publikun të enjten në mbrëmje, në prag të Vitit të Ri, për të frenuar përhapjen e sëmundjes në lagjen e Plazhit Verior të qytetit. 125 persona në atë lagje janë infektuar me COVID-19 që nga mesi i dhjetorit, duke përfshirë pesë raste të reja të regjistruara të hënën.

Kremtimi vjetor i Vitit të Ri përfshin një shfaqje fishekzjarresh spektakolare që ndriçon qiellin mbi Shtëpinë e famshme të Operas në Sidnei. Të paktën 1 milion njerëz zakonisht janë të pranishëm gjatë shfaqjes, por Kryeministrja Berejiklian tha se mënyra më e sigurt për banorët e Sidneit për të parë shfaqjen e fishekzjarreve është nga shtëpia, në televizion./VOA





Lajmet e fundit nga