E fundit!

12:50 Aktualitet

Vrasja e Martin Canit/ Gjykata e Apelit lë në fuqi dënimin për autorin

Gjykata e Apelit ka lënë në fuqi vendimin për dënimin me 1...

Fjalimi i Nolit një shekull më parë, më aktual se kurrë

20 Gusht 2019, 09:03, Blog CNA

Fjala që po paraqesim më poshtë është fjalimi i mbajtur në parlament në vitin 1925, nga Fan Noli, një nga personalitetet më të shquara të kombit shqiptar, i cili kujtohet si një figurë e madhe dhe e shumanshme e letërsisë, kulturës, jetës fetare dhe politikës shqiptare.

Fjalimi i Fan Nolit i mbajtur gati një shekull më parë, sot është më aktual se kurrë. Në Shqipëri është pothuajse e njëjta situatë, si para 94 vitesh.

Dhe ndoshta pas disa vitesh, kur të jetë 100-vjetori i mbajtjes së këtij fjalimi nga Fan Noli, situata ende nuk do të ketë ndryshuar.

Fan S. Noli, nga fjalimi i mbajtur në parlament, 1925:

Në vendin tonë mbretëron konfuzioni i pesë anarkive.

Anarkia fetare: katër fe të ndryshme që nuk kanë zënë rrënjë në zemrën e
një populli pagan.

Anarkia sociale: Këtu s?ka as klasë bejlerësh, as klasë bujqësh, as klasë burzhuazie. Këtu bujku është më bej se beu dhe beu më bujk se bujku. Kemi një shembull të bukur për partinë popullore e cila mbahet sot në fuqi prej bejlerëve nga oxhakët më të vjetër, kurse anatarët e saj lëvdohen se kanë shpëtuar prej bejlerëve.

Anarkia morale: Këtu qeni nuk e njeh të zonë, karakteret dobësohen, qullosen dhe ndërrojnë formë e ngjyrë dita me ditë si në kaleidoskop. Këtu ambicjet janë pa fre e pa kufi, i padituri i di të gjitha dhe i pazoti është i zoti për të gjitha.

Anarkia patriotike: Këtu brenda një dite si me magji tradhëtori bëhet patriot dhe patrioti tradhëtor. Këtu shohim përpara syve tanë të kapërdisen si patriotë të mëdhej ata që kanë luftuar për harfet dhe për flamurin e babës, që kanë djegur Shqipërinë e Mesme ose ata që janë puthur me andartet e i kanë ndihmuar shenjtërojnë anë e mbanë Toskërinë. Këtu si më thoshte një mik është më mirë që njeriu të jetë tradhëtor e të shikojë interesat e tij sepse kështu do të jetë i sigurtë që të nesërmen do të prokllamohet patriot i madh.

Anarkia e idealeve :Këtu idealet e shtrembëra, të errëta e të mumifikuara të Fanarit e të Buhares përfyten e përleshen në një luftë për jetë a vdekje me idealet më të gjalla më elegante e më të nderitshme të Perëndimit. Na mungojnë vetëm idealet e antropofagëve. Po për të zënë vendin e tyre kemi kolltukofagët, krimba të verdhë me kokë të zezë, që rriten me plagët e infektuara të Shqipërisë në lëngim; mund t?i copëtosh, por jo t?i shqitësh nga trupi që kafshojnë dhe thëthijnë.

Herodi tregon se në betejën navale të Salaminës, një athinas kapi një anije persiane me dorën e djathtë e s?e lëshonte, gjersa ja prenë; atëhere e kapi me dorën e mëngjër, ja prenë dhe këtë, atehere e kapi me dhëmbë e s?e lëshoj gjersa ja prenë kokën. Sikur të ngjallej Herodi përsëri do të shikonte që kolltukofagët tanë janë më të fortë se ky trim legjendar i vjetërsisë antike. Që t?i çqitësh këta tanët nga kolltuku duhet të preç jo vetëm duart e kokën po dhe këmbët e trupin.?/ CNA.al