web counter
LEXO PA REKLAMA!

SHKARKO APP

App Store
Google Play

E fundit!

x

Avancon inceneratori i Tiranës/ Dorëzohet vlerësimi i ndikimit në mjedis për instalimin

4 Shtator 2018, 06:17, Aktualitet CNA

Kompania Integrated Energy BV SPV sh.p.k ka avancuar edhe më tej me projektin e inceneratorit të Tiranës duke dorëzuar së fundmi pranë institucioneve shqiptare raportin e vlerësimit të ndikimit në mjedisit për instalimin që do të kryhet. I njëjti dokument nënvizon se ndërtimi i inceneratorit është i domosdoshëm duke qenë se situata me mbetet në kryeqytet paraqitet problematike. Për të argumentuar këtë raporti jep edhe disa shifra lidhur me gjenerimin e mbetjeve.

?Situata paraqitet pothuajse e njëjte dhe me nevoja urgjente për ndërhyrje edhe në Qarkun e Tiranës që përfaqëson edhe Zonën e Mbetjeve nr.1 siç përcaktohet në Strategjinë Kombëtare të Menaxhimit të Mbetjeve Referuar Raportit më të fundit të Gjendjes në Mjedis për vitin 2017, publikuar nga Agjencia Kombëtare e Mjedisit, në Qarkun e Tiranës gjatë 2017 janë gjeneruar gjithsej 288,009 ton mbetje urbane ose 790 ton/ditë3 . Aktualisht të gjitha këto mbetje depozitohen në landfillin e Sharrës, modulet e të cilit tanimë janë të plotësuar. Në kuadër të projektit konçensionar, ka nisur puna për mbylljen e tij dhe depozitimi po vazhdon vetëm me një qelizë deri në ndërtimin e landfillit të ri? thuhet në dokument.

Ndërtimi i impianteve për incenerim në dy faza

Dokumenti i dorëzuar nga kompania që ka bërë vlerësimin e ndikimit në mjedis tregon se zgjidhja teknike e projektit bazohet në ndërtimin e një instalimi për asgjësimin termik të mbetjeve të ngurta urbane me rikuperim të energjisë (incenerator).

?Teknologjia e zgjedhur është ajo e shkatërrimit termik me anë të furrave me zgarë të lëvizshme. Sasia e përgjithshme e mbetjes që mund të trajtojë instalimi është rreth 900 t/ditë. Instalimi do të prodhojë energji elektrike, me anë të një cikli termik me avull (cikli Rankine) që përdor si lëndë djegëse mbetjet urbane? vlerëson raporti.

Dokumenti nënvizon se impiantet e parashikuara janë dy, dhe do të ndërtohen në dy faza sipas parashikimit që bën edhe kontrata koncesionare. ?Projekti parashikon ndërtimin e dy impianteve për incenerim dhe prodhim energjie, me fuqi të prodhuar 7,7 MWe (2 x 3,85 MWe), që do të ndërtohen në faza të ndryshme kohore (njëri pas tjetrit). Sasia e përgjithshme e mbetjeve të trajtuara nga funksionimi i dy inceneratorëve do të jetë rreth 880 t/ditë, në mënyrë që të përballojë dhe volumin total të mbetjeve të qarkut Tiranë. Sasia totale e energjisë që parashikohet të prodhohet nga të katër linjat e incenerimit është 15,4 MWe, dhe konkretisht 3,85 MWe energji, për çdo linjë? thuhet në dokument.

Zona e projektit shtrihet në jug ? perëndim të qytetit të Tiranës, në jug dhe lindje të vendepozitimit ekzistues në Sharrë, ngjitur me të. Ajo zë një sipërfaqe prej 120 hektarë (1,200,000 m2 ), 39.9 % e së cilës është pronë private dhe 60.1 % pronë shtetërore.

Vetëm pak javë më parë Ministria për Infrastrukturën dhe Energjinë bëri me dije se ka nisur procesi i shpronësimit në këtë zonë në funksion të zbatimit të projektit të inceneratorit. 

Raporti analizon të gjithë procesin që do të ndiqet nga momenti kur mbetjet arrijnë në landfill, mënyrën sesi do të bëhet seleksionimi dhe kalimi për djegie, çfarë do të bëhet me mbetjen e hirit dhe me energjinë që prodhohet.

Aktualisht në vend janë tre projekte inceneratorësh ku i pari në Elbasan tashmë i përfunduar prej kohësh është në gjendje pune ndërkohë që në ndërtim janë inceneratori i Fierit dhe Tiranës./ Monitor 





Lajmet e fundit nga