E fundit!

17:00 Aktualitet

SPAK dha pretencën për fraksionin e dosjes “Meta”/ Ish-presidenti reagon nga burgu

Ish-presidenti Ilir Meta ka ndarë qëndrimin e tij pas pret...

Mos pyet Ramën, por veten

25 Maj 2018, 16:59, Opinione CNA

Nga Dr. Bledar Kurti

*Një pyetje të thjeshtë i bëri gazetarja Ambrozia Meta zotit Kryeministër dhe ky i fundit braktisi konferencën për shtyp, dhe gazetarja u bë personazhi më i shquar i javës. Një pyetje u bë dhe një kreu i ekzekutivit u trondit rëndë.

Po ti qytetar apo qytetare e thjeshtë, jo gazetar apo me talent në filologji, nëse do kishe premierin shqiptar përpara çfarë pyetje do i bëje atij?

Ndoshta mund t?a vini me shpatulla pas murit si Ambriosa, ose do përfundoni një objekt shakaje nga ato që di ti bëjë ai me mjeshtëri, pasi ka mbi supe shumë vite tallje e përbuzje me të gjithë shqiptarët. Është e vështirë të pyesësh dhe përballesh me të, por është jashtëzakonisht e lehtë të pyesësh veten. Ashtu nën heshtjen tënde dhe i rënduar me shqetësimet dhe hallet e tua, pyete veten: Çfarë të mirash më ka sjellë mua dhe familjes sime qeverisja Rama? Ja kaq e thjeshtë! Pyete veten përpara pasqyrës apo dialogo me veten me mendje. Dhe, jep një përgjigje e cila do jetë e sinqertë dhe e papërlyer nga propaganda e qeverisë.

Bëj analizën SWOT, siç e bën çdo institucion apo çdo individ kur bën një plan biznesi. Harroje fajin e ka Saliu dhe pretekset e tjera të qeverisë, e merru me të sotmen dhe frikën e së ardhmes. Gjej pikat e forta dhe të dobëta, mundësitë dhe kërcënimet. E më pas jepi notën, meritën apo turpin kryeministrit tënd.

Mos u merr me borxhin e jashtëm apo investimet e huaja të cilat janë katastrofike, sepse ndoshta nuk ke informacion dhe prerje për t?i kuptuar. As nëse Shqipëria po flirton me Turqinë e voton rezoluta kundër ShBA, sepse marrëdhëniet ndërkombëtare e gjeopolitike kërkojnë artikulim mendimi. Por, pyete veten nën ngacmimet e penës sime, në mënyrën më të thjeshtë e të kuptueshme të mundur: A paguan më shumë sot për faturën e ujit dhe dritave? A të mbahen më shumë para nga paga? A paguan më shumë taksa për biznesin tënd? A po dëgjon çdo ditë në lajme për ekzekutime, vrasje e konflikte me armë zjarri? A ke dëgjuar më shumë për shtëpi të bastisura në lagjen ku banon? A ke takuar më shumë miq e shokë që duan të largohen nga ky vend? A je i sigurtë në bukën, domatet, kastravecat, qumshtin, dhe mishin që konsumon? A gjen shërbimin dhe medikamentet e duhura në spitale?

A e ke zgjidhur misterin e madh se përse vendi më i varfër në kontinent ka çmimin më të lartë të naftës? Dhe a ka ndodhur më parë që fëmijët tanë të edukohen mbi homoseksualizmin e të pyeten për eksperiencat e tyre seksuale në shkolla? A je i lumtur që në kartat e identitetit të shqiptarëve përveç gjinisë mashkull / femër do shtohet dhe “tjetër”? A ka vende të lira pune ku mund të shkosh e aplikosh? A i more tokat dhe pronat e gjyshit tënd apo vazhdon ende duke plotësuar herë pas here dokumentacionin e dosjes? A ka ndodhur në këto 28 vite skandali i padëgjuar edhe në vendet afrikane që të shpartallohet prokuroria e shkatërrohen dosjet sekrete, siç ndodhi në Durrës? A ka vend në botë ku drejtorë policie janë në arrati dhe ministri i brendshëm në arrest? Dhe a njeh ndonjë të afërm apo mik që beson se Shqipëria nuk u kanabizua e tëra gjatë viteve të fundit nga veriu e deri në jug?

Nëse këto pyetje nuk kanë kuptim për ty, je njeri vërtetë fatlum dhe meriton të bëhesh lajm mediatik e në rrjete sociale pasi e vërteta është apo refuzosh t?a shohësh se shqiptarët janë në kufirin e mbijetesës.

Këto pyetje mund t’ja bësh vetes me shumë lehtësi. Del apo nuk del të protestosh me 26 maj kundër kësaj qeverie është zgjedhja jote, por t?i përgjigjesh këtyre pyetjeve elementare është detyrimi yt civil. Ndaj hapi sytë e nis e mendo.

“Unë mendoj prandaj jam” (Cogito ergo sum) tha Dekarti. Nëse ti nuk mendon do të thotë që ti nuk egziston, e bashkë me ty i gjithë ky vend. Dhe cilido që lufton për një Shqipëri më të mirë e të ardhme më të mirë për fëmijët tanë po përpiqet e po shpreson më kot. Hapi sytë e jepi përgjigje pyetjeve bazike që të mundojnë çdo ditë, dhe atëherë do veni me supe pas murit jo vetëm këtë Kryeministër por cilindo shtetar që do vijë në të ardhmen.