A do bëhet ky vend?

7 Maj 2018, 12:59, Opinione CNA

Nga Dr. Bledar Kurti

*Përse ky vend është vështirë të bëhet? Përse ky vend është pis, me kthina të errëta, plot tym e me ujëra të turbullta. Sepse në pisllëk e kaos jetojnë krimbat edhe minjtë. Në mjegull fshihen ujqërit. Në ujërat e turbullta notojnë predatorët. Ndaj edhe duket se nuk do pastrohet kurrë ky vend sepse në dritë ekspozohen vemiet dhe grabitqarët, vjedhësit dhe dhunuesit. Ndaj dhe ajo dita e bukur që ne presim me padurim duket se është shumë e largët.

Në një shtëpi të papastër si ky vend, në këtë habitat ideal për insekte vdekjeprurëse dhe miza fekalesh, krijesat e pështirshme bëhen mbretër, lakmiqarët prevalojnë, dhe vjedhësit lulëzojnë. Në errësirë shtetari zhvat me lehtësi nga xhepat e shqiptarit. Në këtë kaos politik, social e ligjor, shkollëpakët bëhen ministra e drejtues që lektojnë mbi vlerat, të korruptuarit caktojnë standardet e të drejtëve, varrmihësit u shesin arkivole idealistëve, shushunjat thithin edhe pikën e fundit të gjakut nga damarët e shpresës së një kombi.

Në një shtëpi të pastër, parlamentarët janë zë dhe jo memeceri, janë institucion dhe jo shurrëhane, janë integritet e jo lavirhane. Në një shtëpi të pastër e ndriçuar nga ligji e shteti i së drejtës nuk ka gjarpërinj e nëpërka, as kusarë të së ardhmes. Në këtë xhungël ballkanase njerëzit nuk vdesin por ngordhin. Të rinj e të vjetër marrin frymë në kufirin e mbijetesës. Ky vend është stazhi i vetë ferrit, dhe fytyrat e sunduesve janë binjake me ato të demonëve.

Por, shqiptarët nuk shuhen lehtë në terrin e natës. Çdo komb ka kalorësit e betejave të cilët do e japin edhe frymën e tyre të fundit për misionin e dritës, shpresës, dhe së ardhmes. Politika është pengmarrësja më e madhe e së ardhmes. Ajo është shumë e rëndësishme për t’ua lënë në dorë derrave.

Atdheu është shumë i çmuar për t’a shqyer derrat. Jeta jote është dhuratë shumë e bukur e dhënë nga Perëndia, për t’a vrarë derrat. Ëndrrat e tua janë tejet të vyera për t’i shuar derrat. Pasionet e tua janë shumë kataklizmike për të t’i përdhunuar derrat. Ti vetë je derr nëse nuk arrin t’i dallosh se kush janë këta derra që pshurrin mbi qenien dhe egzistencën tënde. Hapi sytë e shiko në çfarë llumi mbytës po noton. Ky është akti i parë drejt dritës, shpresës dhe shpëtimit. Dhe vetëm me sytë e hapur mund të themi të gjithë një zëri: Po Shqipëria do të bëhet.