Artan Hoxha (presidenti): Ata që nuk mendojnë si Basha, janë idiotë

18 Prill 2017, 10:49, Aktualitet CNA

Artan Hoxha (presidenti në tentativë), shkruan se ata që nuk mendojnë se zgjedhjet do të vidhen nga paratë e drogës, janë idiotë. Sipas tij, nëse krijohet qeveri teknike, PS nuk e ka më pushtetin e drogës dhe e ka të sigurtë humbjen e zgjedhjeve.

?Çdo shqiptar, përveç idiotit të lindur apo rilindësit të krimbur, e dinë tashmë se vota e lirë dhe zgjedhjet e ndershme jo vetëm që nuk garantohen nga kjo qeveri, por do te dhunohen, me fuqinë e shumëfishuar me kanabis e drogë, nga Rilindja e kriminalizuar dhe Krimi në pushtet.

Simbioza Rilindje-Krim nisi dukshëm në 2011-tën, u zgjerua në 2013-tën, vijoi në 2015-tën. Tashme është konsoliduar, organizuar e përbetuar për të rirrëmbyer me çdo kusht e mjet pushtetin, përmes zgjedhjeve të manipuluara dhe/ose fasade.

Manipulimi do të zbatohet si blerje a joshje masive e votuesve me fonde marramendëse me origjinë kriminale kombinuar me frikësimin e votuesve.

Ky është manipulim i llojit që as nuk mund të parandalohet dhe as nuk mund të ndëshkohet me mjete të zakonshme penale apo të administrimit e monitorimit zgjedhor, përveçse në shkallë fare të vogël. Ky lloj manipulimi, i kombinuar në perfeksion, u zbatua me efektivitët të plotë nga Rilindja në Dibrën e kanabizuar në shtator 2016.

Opozita monitoroi rreptë çdo qëndër votimi e çdo tryezë numërimi por, më kot, manipulimi ishte bërë para ditës së votimit. Dibra u monitorua nga ndërkombëtarët ndërsa prokuroria hapi çështje penale, por më kot. Diferenca me më pak se 400 vota në 2015-ten u dhjetëfishua pas një viti e u shtuan ndjeshëm votuesit ndërsa duhet të ishin më të paktë.

Meqë mjetet klasike opozitare, ndërkombëtare apo te sistemit të drejtësisë nuk funksionojnë përballë këtij lloj manipulimi të simbiozës Rilindje-Krim mbetet veç rruga tjetër, ajo rrëzimit të qeverisë Rilindje-Krim përpara zgjedhjeve, ngritja e një qeverie të çliruar nga kjo simbiozë, për rrjedhojë, shkëputja e lidhjes së krimit me shtetin duke spastruar nga institucionet shtetërore pjesën dërrmuese të individëve që i përkasin kësaj simbioze.

Kjo është zgjidhja e vetme, zgjidhje radikale në situate anormale. Paskëtaj, Rilindja mund të vijojë simbiozën me krimit por, pa pushtetin e drejtpërdrejtë dhe pa shtetin e kriminalizuar, fuqia e saj manipuluese zgjedhore dobësohet ndjeshëm. Humbja elektorale e saj është e sigurtë. Më e mira do të ishte që opozita e ardhshme ? Partia Socialiste ? të ishte e çliruar nga simbioza RilindjeKrim por, për këtë, krahas shoqërisë dhe shtetit të çliruar, duhet të kontribuojnë në radhë të parë masa e gjerë e socialistëve dhe individë me peshë në të majtë që nuk janë kompromentuar me simbiozën RilindjeKrim apo kanë dalë hapur kundër saj?, shkruan presidenti në tentativë.

Ai ndërkohë thotë se gjithë ndërkombëtarët janë me Bashën, por ata nuk mund të shprehen dot zyrtarisht, pasi kjo do të nënkuptonte rrëzimin e qeverisë. ?Ndërkombëtarët, ata që flasin në emër të institucioneve shtetërore a ndërshtetërore, e kanë thuajse të pamundur të deklarohen hapur e zyrtarisht në favor të zgjidhjes radikale opozitare ndonëse pjesa më e madhe e tyre e kuptojnë farë mirë situatën anormale. As që duhet pritur që të thonë në deklarata e tyre se opozita bën mirë që bojkoton parlamentin, përkundrazi; apo që opozita bën mirë që nuk hyn në zgjedhje, përkudrazi. Nëse do ta bënin këtë do të ishte njësoj sikur të kërkonin rrëzimin e qeverisë. Kur ka ndodhur ndonjëherë që të ndodhë sot?!

Ndërkombëtarët e tjerë, të çliruar nga detyrimet shtetërore a ndërshtetërore, e kanë më të lehtë të shprehen dhe po shprehen çdo ditë e më shumë, çdo ditë e më qartë, në favor të zgjidhjes radikale.

Pavarësisht zgjidhjes, të gjithë ndërkombëtarët bashkohen në një qëndrim: askush nuk thotë se pretendimet opozitare për rrezikun e zgjedhjeve janë sajesa apo të fryra kot më kot, përkundrazi; aq më pak të dalin garant se nuk do ketë manipulim, përkundrazi. Kaq mjafton. Shqiptarët duhet ta arrijnë vetë zgjidhjen. Sot ajo është e vetme dhe radikale për këtë situatë anormale: një qeveri e re që krijon besim të mjaftueshëm në lirinë e votës dhe ndershmërinë e zgjedhjeve. E, këtu do jemi e do shohim që sapo të arrihet, edhe pse radikale, zgjidhja do të përshëndetet nxehtësisht e do të mbështetet unanimisht nga ndërkombëtarët si zgjidhje e mençur, civile, kushtetuese, demokratike, europeiste, perëndimore?, shkruan presidenti në tentative, thotë TemA.