Rama lakuriq!

15 Nëntor 2016, 10:51, Aktualitet CNA

Kryeministri i vendit, Edi Rama është një personazh që shqiptarët e kanë parë lakuriq buzë detit, duke shijuar plazhet e Francës. Por, Edi Ramën lakuriq po e shohin edhe politikisht, jo vetëm në 3 vite qeverisje por edhe në zgjedhjet e tij të shfrenuara diplomatike.

Kryeministri është lakuriq kur flet se ka bërë një reformë të madhe me OSHEE-në dhe Energjinë Elektrike, por në asnjë rast nuk mund të mbulohet me gjethe fiku, kur burgosen qytetarët për 30 mijë lekë të vjetra, apo OSHEE zhvillon dhjetëra tendera me miliarda lekë me 99.99% të vlerës.

Kryeministri Rama flet për Reformë në Arsim, por nuk mund të mbulohet me gjethe fiku, kur dyfishohen studentët në Universitetet Private dhe krijohet një kaos i cili kushton gati 12 milionë euro në vit, në familjet e shqiptarëve, të cilat shkojnë në xhepat e klientëve të tij.

Rama është sërish lakuriq, kur pretendon se ka bërë reforma ekonomike, por ka marrë një borxh publik 63 % dhe e ka çuar në 73 % e nuk ka shtruar asnjë centimetër rrugë, por vazhdon të bëjë lulishte dhe të mbjellë bar në qendrat e qyteteve.

Qeveria shpall fitoren, legalizimet dhe ndërtimet pa leje. Në fakt sot pas 3 vitesh vazhdon ende këtë shpërndarje, legalizimet e Berishës apo të burgosur dhe qytetarë të thjeshtë kur ndërron tjegullat e çatisë.

Flet për qeverisje më të mirë, por hesht për vrasjen e Ardit Gjoklajt në Sharrë, dhe mbron Benjaminin e tij në krye të Bashkisë së Tiranës.

Rama është lakuriq kur tenton ta mbushë Shqipërinë me armë kimike, por shqiptarët mblidhen dhe i fusin shkelmin, tani në mënyrë të turpshme rikthen ligjin që e anuloi vetë dhe kërkon ta miratojë me çdo kusht, për ta kthyer Shqipërinë në një kosh plehrash.

Edi Rama është Lakuriq, kur kujtojmë hapjen e kutive pas zgjedhjeve të vitit 2009, 21 Janarin dhe Ilir Metën, dy të parat i harroi, këtë të fundit e ka aleat në Qeveri, atë që dje e quante hajdutin e Berishës.

Kryeministri është lakuriq në diplomacinë e tij duke u katandisur në kllounin e tavolinave me diplomatë të huaj, duke treguar barcaleta, apo duke sharë kandidatët për Presidentë, por që tani e gjen veten me shpatulla pas murit.

Ndoshta këto të mësipërmet janë pak për të treguar lakuriqësinë e Kryeministrit tonë, i cili përpiqet të mbulohet me mediat e kazanit të tij, që i financon me tendera dhe korrupsion që burojnë nga paratë e taksapaguesve shqiptarë./Citynews