web counter
LEXO PA REKLAMA!

SHKARKO APP

App Store
Google Play

E fundit!

x

Hapet konkursi për mësuesit/ Dorëzimi i dosjes deri më 23 nëntor

15 Nëntor 2016, 07:46, Aktualitet CNA

Ministria e Arsimit dhe Sportit ka miratuar afatet e konkurrimit për mësuesit që dëshirojnë të ushtrojnë profesionin e mësuesit në sistemin e arsimit parauniversitar. Në zbatim të shkresës së Sekretarit të Përgjithshëm të MAS nr.ll275, datë 09.11.2016, aplikimi bëhet në zbatim të Udhëzimit nr.38, datë 06.10.2015 ?Për lëvizjet paralele, emërimin dhe largimin nga puna të mësuesve?, ku në themel të rekrutimit është testimi nëpërmjet portalit ?Mësues për Shqipërinë?.

Sipas shkresës së MAS, testimi i mësuesve do të bëhet në 21 janar 2017, ndërkohë që dorëzimi i dosjeve do të bëhet pranë drejtorive dhe zyrave arsimore deri në datë 23.11.2016. Më tej, në shkresën e MAS saktësohet se aplikimi në portalin ?Mësues për Shqipërinë? do bëhet në periudhën 11-16 dhjetor 2016.

Kandidatët duhet të dorëzojnë pranë drejtorive arsimore 13 dokumente dhe më pas do të bëhet vlerësimi tyre nga DAR/ZA.

Kriteret dhe afatet

Këtë vit testimi i mësuesve që duan të punësohen në sistemin arsimor parauniversitar është lënë në muajin janar dhe jo në dhjetor si vitin e shkuar. ?Testimi i kandidatëve për ushtrimin e profesionit të mësuesit në sistemin arsimor parauniversitar do të zhvillohet më datën 21.01.2017, ora 10:00-12:30, në mjediset e planifikuara nga drejtoritë arsimore rajonale. Në testimin për ushtrimin e profesionit të mësuesit kanë të drejtën të marrin pjesë: kandidatët që janë pranuar në fazën e parë të konkurrimit nëpërmjet vlerësimit të dosjes, fazë e cila zhvillohet në çdo njësi arsimore vendore (DAR/ZA); kandidatët që kanë marrë pjesë në testime paraardhëse ?Mësues për Shqipërinë? dhe dëshirojnë të përmirësojnë rezultatin e tyre?, përcaktohet në shkresën e Sekretarit të Përgjithshëm të MAS, Plarent Ndreca.

Pra, të gjithë kandidatët që kanë hyrë në dy testimet e mëparshme, në 2014-ën ku hynë në testim rreth 5200 mësues dhe në 2015-ën, që u testuan 3800 mësues kanë të drejtën të hyjnë edhe në testimin që do bëhet në 21 janar 2017, nëse duan të përmirësojnë rezultatet.

Po ashtu, më tej në shkresën e MAS sqarohet se programet orientuese do të publikohen në faqen e IZHA dhe në portalin ?Mësues për Shqipërinë?, si dhe në faqet zyrtare të DAR/ZA-ve brenda datës 25.11 2016. Ndërkohë, në udhëzim përcaktohet se kandidatët kanë afat deri më 23 nëntor për dorëzimin e dosjes personale pranë zyrave arsimore përkatëse. Dosja duhet të përmbajë të dokumentet e përcaktuara në pikën 2 të kreut 2, të udhëzimit nr.38. (dokumentet që duhen të dorëzoni i gjeni edhe në tabelën bashkëngjitur shkrimit.) Sa i përket aplikimit online në portalin ?Mësues për Shqipërinë?, përcaktohet se kandidatët plotësojnë formularin për të hyrë në testim në periudhën 11-16 dhjetor 2016. Lista përfundimtare e aplikantëve hartohet nga Drejtoria e Teknologjisë dhe Informacionit në MAS dhe u dërgohet DAR/ZA-ve brenda datës 23 dhjetor 2016.

Fazat e konkurrimit

Në udhëzimin nr.38 të MAS, emërimet e mësuesve bëhen nëpërmjet konkurrimit, i cili ka tri faza. Faza e parë është konkurrimi me dosje, ku MAS ka përcaktuar 13 dokumente dhe kritere që kandidatët duhet të plotësojnë. Midis tyre janë kualifikimet e ndryshme shkencore, botime, kumtesa dhe publikime të botuara në fushën e arsimit. Po ashtu, pjesë e kësaj dosjeje duhet të jetë edhe fotokopja e licencës së provimit të shtetit për profesionin e rregulluar të mësuesit.

Në udhëzim përcaktohet se nëse një dosje nuk i ka të plota këto dokumentet, skualifikohet nga të gjitha fazat e konkurrimit. Komisioni i vlerësimit brenda pesë ditëve nga mbyllja e afatit të aplikimit bën vlerësimin e dosjeve të kandidatëve. Kandidatët që janë kualifikuar në konkurrimin me dosje duhet t?i nënshtrohen testimit ?Mësues për Shqipërinë?. Pas testimit, hartohet lista e kandidatëve për çdo profil/lëndë dhe liston kandidatët sipas pikëve të grumbulluara në testim. Këtyre pikëve u shtohen edhe pikët e marra nga dosja dhe përpilohet një listë përfundimtare e pikëve të fituara.

Faza e tretë e konkurrimit është zgjedhja e vendit të punës, ku përparësi i jepet kandidatit që ka grumbulluar numrin më të madh të pikëve. Kandidati emërohet nga drejtori me kontratë individuale pune me afat një vit kalendarik, e cila konsiderohet si periudhë prove.

Në përfundim të kontratës, pas miratimit të këshillit të prindërve të shkollës dhe komisionit të shërbimit psiko-social, komisioni i cili ngrihet në këtë shkollë bën emërimin definitiv të mësuesit. Në rastet kur këshilli i prindërve apo komisioni psiko-social nuk bëjnë vlerësim pozitiv për periudhën e njëvjeçare të provës, drejtori i shkollës ndërpret marrëdhënien e punës me mësuesin. Kandidatët nuk mund të refuzojnë më shumë se tri vende pune të lira në tri njoftime të komisionit. Në rast se refuzojnë më shumë se tri, kandidatët hiqen nga lista e renditjes. /GSH/





Lajmet e fundit nga