Bylykbashi, kryetari pa kryesi

15 Nëntor 2016, 10:07, Aktualitet CNA

Lulzim Basha ka emëruar dje në krye të Partisë Demokratike të Durrësit, Oert Bylykbashin, deputetin demokrat të atij qarku, një nga njerëzit e afërt të tij. Gjatë kohëve të fundit, Bylykbashi ka qenë një nga njerëzit më aktivë në politikën shqiptare dhe njeriu që përfaqësoi opozitën gjatë negociatave për Reformën në Drejtësi.

Bylykbashi pritet të ketë një sfidë mjaft të madhe përpara, ai po merr drejtimin e një dege të përçarë edhe më keqazi pas shkarkimit të kryetarit dhe kryesisë së degës, pas vendimit të Bashës për ta ndarë atë në fshat dhe qytet. Humbja në zgjedhjet lokale ishte një katastrofë për Partinë Demokratike, gjë që detyroi Bashën që më në fund të kuptonte gjendjen reale dhe të ndërhynte për të ndryshuar gjërat. Por mesa duken ndërhyrja me vonesë dhe zgjedhja e gabuar për ndarjen e degës thelloi ndasitë, përçarjet dhe problemet brenda opozitës. PD ishte e pamundur të zhvillonte një kuvend dege dhe të zgjidhte një kryetar me gare. I ndodhur shumë pranë zgjedhjeve, Basha emëroi një nga besnikët e tij në krye të një prej degëve më të mëdha në vend.

Sot PD e Durrësit ka një kryetar që ndoshta ka mundur të sigurojë edhe çelësat, që ju vendosi dyerve, pasi i theu Eno Bozdo pak muaj më parë. Por emërimi i Bylykbashit nuk mjafton. Ai është i vetmi kryetar pa kryesi, ndoshta i vetmi kryetar partie në botë që se ka atë, pasi në mënyrë anti-statutore me firmën e Bashës u shpartallua edhe kryesia e degës e cila në fakt për rezultatet në zgjedhjet lokale ishte po aq përgjegjëse sa vetë kryetari.

Dega e PD-së në Durrës tani do të ketë kryetarin e saj, por kjo nuk do të thotë se debatet e brendshme dhe problemet janë mbyllur. Bylykbashi duket përballë një sfide shumë të vështirë, si një kryetar pa sekretariat, pa kryesi. Koha po i punon kundër dhe kjo jo për faj të tij. Partia Demokratike e Durrësit, megjithëse ka qenë një prej më të mëdhave në vend, duket mjaft e rrudhur, e me sherrnaja dhe debate të brendshme që vështirë se mbyllen me emërimin e kryetarit të ri, emërim që vjen me mjaft vonesë dhe nuk i jep aspak kohë kreut të ri të degës të zgjidhë problematikat e akumuluara jo vetëm prej debateve të brendshme, por edhe nga ndërhyrja e qendrës, të cilat thjeshtë dhe vetëm kanë nxitur përçarje./Citynews