3 tradhëtitë e kryeministrit ndaj ish-deputetit/Rama-Meta, përplasja e rradhës për Koço Kokëdhimën

9 Korrik 2016, 08:38, Aktualitet CNA

Koço Kokëdhima duket se është kthyer në një tjetër mollë sherri mes Kryeministrit Edi Rama dhe Kryetarit të Kuvendit, Ilir Meta. Pas humbjes së mandatit të deputetit si pasojë e një vendimi të Gjykatës Kushtetuese, Koço Kokëdhima, është shfaqur shpeshherë në takime me Kryetarin e Kuvendit, Ilir Meta, çka duket se ka xhelozuar Kreun e Qeverisë, Edi Rama.

Madje mësohet se edhe në takimin e fundit të zhvilluar mes Kryeministrit dhe Kryetarit të Kuvendit, një nga çështjet e diskutuara ishte edhe ajo mbi Kokëdhimën. Burimet theksojnë se Rama i ka shprehur Metës rezervat e tij në lidhje me mbrojtjen që Kreu i LSI-së po i jep Kokëdhimës, i cili duket se nga ana e tij ka intensifikuar takimet dhe bisedat me Kryeparlamentarin, sidomos në Gjirin e Lalzit.

Duket se Meta jo vetëm po e shikon Kokëdhimën si një aleat të ri në përplasjen me Edi Ramën, por duket se ka zgjedhur mënyrën më të mirë për të acaruar Kryeministrin, i cili e ka pasur Kokëdhimën një nga mbështetësit dhe mbrojtësit mediatikë më të fortë më të paktën 15 vitet e fundit.

Kokëdhima e ka trajtuar humbjen e mandatit të deputetit si një tradhëti apo lënie në baltë që iu bë atij nga Kryeministri Rama, i cili përgjatë debatit në lidhje me këtë mandat, nuk i garantoi të njëjtën mbrojtje, si në rastin e kolegëve të tjerë të Kokëdhimës, të cilët akuzoheshin nga opozita me të njëjtën akuzë: përfitimin e fondeve publike pasi kishin marrë mandatin e deputetit.

Por ky nuk ishte i vetmi moment kur Kokëdhima është ndjerë i tradhëtuar nga Edi Rama. Në procesin e organizimit dhe zgjedhjeve të brendshme në Partinë Socialiste, Kokëdhima aspironte postin e Sekretarit të Përgjithshëm, funksion që mbahet nga Gramoz Ruçi. Me këtë të fundit, Kokëdhima madje pati edhe një debat në distancë, por mes dy politikanëve, duket se Rama zgjodhi Ruçin. Paralelisht me këtë lëvizje, Kokëdhima u vendos nën presionin e deputetëve të PS-së, sidomos të Qarqeve Vlorë-Gjirokastër, rajon i cili i ishte besuar ish-mikut të Edi Ramës për organizimin e strukturave dhe zgjedhjeve në PS. Por me një vendim Kryesie, Rama vendosi të dublojë Kokëdhimën, duke deleguar në dy qarqet jugore të vendit dy ministra, ndërsa la mënjnë Kokëdhimën. Të gjitha këto prapaskena, duket se kanë çarë përfundimisht marrëdhënien Kokëdhima-Rama, ndërsa ish-deputeti socialist i Vlorës, i gjendur nën akuzat e vazhdueshme të opozitës dhe sulmet nga brenda partisë së tij, ka parë si aleat, Kryetarin e LSI-së, Ilir Meta. /citynews/