E fundit!

14:36 Aktualitet

Rama para samitit BE-Ballkani Perëndimor: Tri gjëra nuk parashikohen, Zoti, seksi dhe BE-ja

Kryeministri Edi Rama ka komentuar procesin e integrimit t...

Nga Mero Baze/ S’ka më “impulse”, ka filluar dallga!

9 Nëntor 2015, 19:44, Opinione CNA

Prej më shumë se një muaj, kryetari i LSI-së, Ilir Meta dhe disa bashkëpunëtorë të tij, po kërkojnë ndryshime në qeveri, duke pasur formulime të kujdesshme, por të qarta, që përmblidheshin në nevojën e ?impulseve të reja?, por kryeministri Edi Rama i ka injoruar ato dhe i ka konsideruar të parëndësishme.

Sinjalet nisën në të vërtetë, kur nisi dhe beteja e opozitës kundër Ilir Metës, lidhur me çështjen e CEZ, ku kryeministri Rama dhe ministri Gjiknuri luajtën rolin e një spektatori indiferent, edhe pse në të vërtetë debati nisi nga avokatura e pajtuar nga shteti shqiptar, e cila në vend të mbrojtjes juridike, kishte bërë trajtim politik të problemit. Për më tepër, disa aktorë të përfshirë në këtë korrupsion, siç është drejtori aktual i ERE, Petrit Ahmeti, jo vetëm që nuk u prekën nga detyra që kishin, por u tentua të justifikohen.

Situata u qetësua disi pas seancës parlamentare, ku u debatua, falë ndërhyrjeve të forta të deputetit Braçe dhe Ballës, dhe pas kthimit nga Uashingtoni dhe shkuarjes së kryeministrit Rama në zyrën e Ilir Metës. Pas kësaj, Rama mbajti një fjalë serioze në Kuvend, ku denoncoi lidhjet e ish-kryeministrit Berisha me kompaninë DIA, e-mailet e këshilltares së tij Guxholli, para se të niste privatizimi, si dhe konfirmimin e tij se qëndrimet e deputetëve Braçe e Balla, ishin dhe qëndrimet reale të PS.

Dyshimet se Edi Rama dhe Lulzim Basha ishin përfshirë në një dialog përmes sekserëve të tyre të përbashkët rrotull dhe brenda TV Klan, për një sulm ndaj Metës, nuk u daravitën, por kriza duket se u kalua.

Zhvillimet e fundit, dhe sidomos nevoja për një konsesues të gjerë për reformën në drejtësi, duket se kanë ndarë qëndrimet e PS nga LSI, ku kjo e fundit është për një dialog të gjerë dhe konsesus, ndërsa PS për qëndrimin e Komisionit të Venecias dhe pastaj për referendum, nëse nuk arrihet konsesusi.

Dorëheqja e Nasip Naços nuk është në fakt, fryt i këtyre mosmarrëveshjeve, siç duket në fasadë, por më shumë një vendim i Ilir Metës për t?i treguar Edi Ramës, se ai po tërheq nga qeveria një ministër të papërfolur dhe pa probleme komunikimi ndërpartiak, ndërsa ai, Edi Rama, mban në qeveri ministra që e kanë sulmuar atë personalisht dhe që janë përfolur për korrupsion. Ky është mesazhi i qartë dhe cinik që ai po i çon Ramës me këtë tërheqje nga qeveria të Nasip Naços. Në një kontekst më të gjerë, ai po i vendos Ramës një standart që Rama zor se ja del dot ta ruajë, pasi do t?i duhen shumë herë më tepër arsyetime për të mbajtur në qeveri ministra që kanë akuza konkrete dhe jo shumë vështirë për t?u verifikuar si të korruptuar, dhe që kanë një arrogancë në raportin politik me koalicionin dhe vet strukturat e pushtetit, për shkak të lidhjeve vertikale me Ramën.

Tërheqja mund të mos mbyllet këtu. Pas ministrit Naço, që është një sinjal për të vendosur një standart të vështirë për Ramën, nuk është çudi që Meta të tërheqë dhe ndonjë ministër tjetër, akoma më të papërfolur se Naço dhe ta zëvendësojë me dikë më politik dhe më agresiv në publik në raport me Ramën, sikurse ka përzgjedhur dhe zotin Manjani. Pra, ky është një proces që nuk ndal dhe nuk mund të injorohet si ajo punë e impulseve. Se nuk është impuls. Është një dallgë që ka nisur dhe që, nëse nuk di si të sillesh me të, mund të kthehet në cunam.