E fundit!

13:08 Aktualitet

Vrasja e efektivit/ Xhaxhai i Enea Mekollit ngre akuza: Ishin pa asnjë lloj mbrojtjeje

Xhaxhai i efektivit të vrarë, Enea Mekolli, Hazbi Mekolli,...

Unë dua një Shqipëri ndryshe, jo t'i vë flakën!

5 Nëntor 2015, 22:04, Opinione CNA

*Nga Artan FUGA

I dashur doktor, i dashur mik, i dashur Mondi,

deshiron të marri flakë e gjithë Tirana si Parisi 50 vjet përpara???

Do të dilnit t’i shuanit pastaj ato flakë???

Do të dinit?

Njëherë 21 janari dhe tani një i dytë po kërkohet. Këtë kërkon, flakë e zjarr???

Jo miku im, unë jam shprehur publikisht qysh atëhere dhe nuk i ndahem mendimit tim sepse e di që kam të drejtë. Unë nuk pranoja që as të cohesh turma e qytetarëve si mish për top te dera e Pallatit kafkajan, as të gjuheshe mbi shpirt e mish robi që andej me dyfek. Asgjë nuk sjellin këto teknika. Marrin vetëm jetë dhe ndezin urrejtjen mes shqiptarëve më shumë sa ndizet cdo të enjte në ekran.

Apo dëshiron edhe ti mosbindjen civile si formë guerriljeje urbane?

Njeri na e do bindjen e verbër, na thotë ndërtoj shtet, por jo demokraci, tjetri na kërkon mosbindje të verbër.

Na duan të futemi mes bindjes të verbër dhe mosbindjes të verbër, a thua se ne intelektualët jemi budallenj dhe nuk e dimë se ka rrugë të tjera për ta ndryshuar rrënjësisht dhe shumë shpejt këtë vend!

Djegim veturat, nuk paguajmë në spitale private, nuk paguajmë elektrikun, nuk paguajmë interesat e kredive bankare, braktisim mësimin, ecim në të kuqe, grabisim dyqane, prishim arkiva dhe nxjerrim nga burgjet kriminelë.

Kjo është rruga për të kundërshtuar e mosbindjes civile ?

Jo, unë nuk pajtohem më ty në metodat e flakës që e kanë djegur Shqipërinë disa herë, një herë në disa vjet.

Jo, unë mendoj se kjo gjendje e rëndë ku ndodhemi duhet ndryshuar por di rrugë të tjera për ta bërë. Jam i sigurt dhe nuk heq dorë, ndonëse jam i zhgënjyer dhe i trishtuar.

Studentët??? Nuk i gjykoj kurrë, janë të rritur. Unë sikurse edhe ti për ta punojmë, ashtu herë mirë e herë keq, por sinqerisht.

Por, unë njoh shumë grupe studenësh, edhe nga ata që duan të gjuajnë me vezë, vendim i tyre dhe nuk jam unë që i gjykoj, por edhe nga ata që nuk pajtohen me këtë metodë dhe u rrinë larg atyre metodave, dhe presin t’u propozohen rrugë të tjera.

Cfarë do të bëje nëse të dy palët janë studentë kur thua shprehjen pa kuptim “t’u qendrojmë afër studentëve” ???

Mos i përgjithësojmë, ndonëse seicili grup gjen format e tija dhe unë nuk paragjykoj asnjerin. Le të lulëzojnë njëqind lule.

Por, kam të drejtë të kem mendimin tim. Pse harxhon kohë me mua, kritiko qeverinë njëherë, është kohë e fituar. Kam deshirë edhe unë të të dëgjoj publikisht ty, njëherë të vetme, sepse të respektoj e të dua si mik.

Te pres o mik në gazeta, në televizione, në mbledhje, në forume, në ballafaqime me deputetë kokëtula, me administratorë gënjeshtarë, me lubi tinzare. Hajde se kemi nevojë për ty.

Nuk të sjell gjë që edhe kufizohesh në blogje dhe kërkon që të tjerët t’i venë flakën Parisit, Londrës, Tiranës apo Ndroqit. Eshte paradoks ndarja mes qenies dhe mendimit.

Unë mendoj se ka edhe rrugë të tjera që protesta të jetë efikase. Protesta efikase.

Falemnderit që ke vlerësuar nga ekrani praninë time në dy vjet protesta juridike, sociale e kulturore për ta mbrojt rininë universitare nga lubitë private. Bashkë me disa miq. Sa pak na kanë ndjekur dhe mesa vështirësi ndonëse na jepnin plotësisht të drejtë.

Po të ishin më të moblizuar ne masivisht, po të kishte më shumë profesora me ne në kundërshtime gjërat do të ishin zgjidhur me kohë, as studentët nuk do të kishin përfunduar te rajoni i policisë, sikurse thua mik i dashur.

Aroganca e qeverisë dhe e Ministres të Arsimit që e kanë keqtrajtuar sipas meje, lubitë, si edhe apatia e profesoratit, i coi studentët te dera e rajonit të policisë.

Hajdeni pra, nëse jeni me ne, mblidh dyqind profesorë të tjerë dhe bashkohemi me Forumin e Lirive Universitare a ku të doni.

Shkojmë ulemi te Parlamenti demokratikisht dhe kërkojmë të na presin brenda si qytetarë. Mendon se do të na refuzojnë??? Vetëm disa orë, kaq duhet.

Mos e shmang temën e vërtetë që vlen për t’u trajtuar.

Mos bëni sehir përpjekjet tona duke na parë në ekran si show televiziv. Kemi harxhuar energji dhe nga jeta jonë, nga shënderti ynë. .

Se ne edhe opozita na la në baltë, na tradhëtoi rëndë, me një fjalë na gënjeu. Jo se kishim ndonjë lidhje, por meqë u angazhua se do ta conte ligjin në Kushtetuese.

Ne e dimë shumë mirë sepse veproi kështu.

Ajo na kërkon maksimumin : mosbindjen civile; ne i kemi kërkuar një shërbim minimal, që nuk e bën, ta cojë projektligjin në Gjykatë kushtetuese sepse është i mbrapshtë dhe atentati i rëndë ndaj demokracisë dhe kulturës kombëtare.

Si mund të kërkosh maksimalen kur nuk bën minimalen !!!

Desha të të dëgjoja edhe te konsulta e verës e zotit Basha, ku ishe por nuk fole. Sa shumë e doja ta dija mendimin tënd se është i pjekur!

Me ta merru poashtu, jo me mua sepse unë jam qytetar i angazhuar, kritik, por e besoj forcën e demokracisë dhe kam bindjen se Shqipëria mund të transformohet pa i vendosur zjarrin apo minat.

Dëgjomë, pastaj vramë !

Hajdeni pra, kemi nevojë për ju, demokratikisht, intelektualisht, kulturalisht vendosmërisht, burrërisht, realisht, jo thjesht në blogje gazetash dhe duke parë kolegët tuaj që capërlohen nga ekrani.

Të përqafoj Mond, dhe të pres, atje në betejë, jo pas ekranit,

*Pergjigje prof. dr. Edmond Kapidanit, mikut tim të dashur, që në blogun e lapsit.al, pasi më kritikon mua si paqësor, shprehet se metodat e venies së flakës si Parisit dikur, janë zgjidhja.