Banka e Shqipërisë/ “Borxhlinjtë”, qytetet me më shumë hua

1 Qershor 2015, 06:21, Ekonomi CNA

Tirana mund të jetë qyteti më i pasur, të paktën nga treguesi i depozitave, por është edhe qyteti më me shumë borxhlinj në gjithë vendin. Këtë të fundit e tregojnë sërish statistikat e Bankës së Shqipërisë për kredinë e dhënë nga bankat sipas qyteteve.

Tirana ka më shumë se 2/3 e totalit të kredisë. Në fakt, këtu i referohemi vetëm pjesës së borxhit formal që qytetarët apo bizneset kanë parë pranë bankave të nivelit të dytë.

KREDIA

Në total kredia në vend është 546 miliardë lekë, të paktën për tremujorin e parë të 2015, referuar statistikave të Bankës së Shqipërisë. Ky total ka ardhur në rënie krahasuar me një tremujor më parë, që korrespondon me fundin e 2014, kur totali i kredisë ishte 549 miliardë lekë.

Tirana nga ky total ka jo pak, por 397 miliardë lekë në fund të janar-mars 2015, ndërkohe që një tremujor më parë kishte 399 miliardë lekë. Edhe pse me një tkurrje prej 20 milionë dollarësh, sërish kryeqyteti mbetet qyteti më në borxh me bankat. Kjo në fakt ka logjikë kur shumica e biznesit është e përqendruar pikërisht këtu. Qyteti i dytë më i kredituar nga bankat është Durrësi, me 41 miliardë lekë në fund të tremujorit të parë 2015.
I treti në listë është Elbasani me një kredi totale prej 16 miliardë lekësh, që ndiqet më pas nga Fieri me 14 miliardë lekë e Vlora me 13 miliardë lekë kredi. Shuma totale përfshin si kredinë e dhënë për bizneset, ashtu edhe për individët. Nga qytetet kryesore më pak kredi është dhënë për Korçën me 8.7 miliardë lekë dhe para saj është Lezha me 8.8 miliardë lekë në fund të marsit 2015. Qytetet e tjera të mbledhura së bashku kanë një total prej 33 miliardë lekësh.

INDIVIDËT DHE BIZNESET

Bizneset, ashtu sikurse pritet të paktën për Tiranën, janë kredimarrësit më të mëdhenj. Bankat tregohen dukshëm më bujare me këto të fundit edhe pse individët mbajnë një pjesë të mirë të depozitave në sektorin bankar. Për Tiranën, bizneset kanë 309 miliardë lekë borxh ndaj bankave, kurse individët 88 miliardë lekë, referuar shifrave të BSH deri në mars 2015.
Raporti më pas për qytetet e tjera zbutet, duke kaluar për Durrësin 29 miliardë lekë për biznesin dhe 11 miliardë për individët apo për Elbasanin me 10 miliardë për biznesin dhe pak më shumë se 5 miliardë për individët. Por ka edhe qytete të tjera ku diferenca mes kreditimit të biznesit dhe individëve është as më pak e as më shumë se 1 miliard lekë. Të tilla janë Shkodra, Korça, Vlora.

Qytetet e tjera më të vogla të grupuara si ?të tjera? janë të vetmet që në totalin e tyre kanë më shumë kredi për individët sesa për bizneset ku nga 33 miliardë lekë të dhëna, 14.9 miliardë janë për bizneset dhe 18.2 miliardë janë për individët./panorama