Thellohen hetimet për kontrabandën e cigareve në Kakavijë

28 Maj 2015, 06:39, Ekonomi CNA

Kontrabanda e cigareve që po zhvillohet në Kakavijë, në të cilën dyshohet të jetë i përfshirë dhe një ministër, ka detyruar autoritetet më të larta hetimore në dogana të nisin me urgjencë një hetim të thelluar.

Skandali i kontrabandës me cigaret, i cili u denoncua vetëm para pak ditësh nga gazeta ?SOT?, mund t?i kushtojë shtrenjtë shtetit shqiptar jo vetëm në aspektin ekonomik ku vihet re një rënie e ndjeshme e të ardhurave të parashikuara në buxhet, por dhe në atë moral, në raport me ndërkombëtarët, të cilët kanë marrë në dorë disiplinimin e vendit tonë nëpërmjet programeve ndihmëse dhe bashkëpunuese. Në këtë kuadër, burime bëjnë me dije se tashmë ka nisur një hetim i thelluar, në të cilin është përfshirë dhe pala greke. Me hetimet po merren autoritetet më të larta hetimore në dogana, por nga burime të pakonfirmuara mësohet se në këtë hetim është përfshirë dhe prokuroria. Sipas burimeve të ?SOT?, mësohet se pala shqiptare i ka kërkuar homologes greke, hyrje-daljet e cigareve nga Janina dhe Kapshtica. Gjatë hetimit, mësohet se do të shihen dhe hyrje-daljet e këtij produkti në Shqipëri. Kontrabandë edhe Greqi .

Hetimet e nisura për kontrabandën e dyshuar në Shqipëri kanë zbuluar se edhe shteti fqinj Greqia nuk mbetet pas, në raport me zhvillimin e këtij aktiviteti të kundraligjshëm, siç është kontrabanda e cigareve. Gjatë hetimeve, pala shqiptare dyshohet të ketë rënë në gjurmët e një bashkëpunimi mes doganierëve shqiptarë dhe atyre grekë, ku kamionë të ngarkuar në Greqi kanë dalë si furnizim me cigare, ndërkohë që në Shqipëri mësohet të kenë hyrë si mall tjetër. Sakaq, një tjetër skemë kontrabande dyshohet se po zhvillohet gjithashtu matanë kufirit shqiptar, në Greqi. Sipas burimeve , mësohet se për të shmangur akcizën e lartë, në doganat greke deklarohet sikur një numër i konsiderueshëm kamionësh me cigare kalojnë në Shqipëri, por në vërtetë rezulton se cigaret rihyjnë në territorin grek pa kaluar doganën, për t?u shitur më pas në këtë shtet pa akcizë. Pezullimi i 8 doganierëve, si u fshehën të dhënat për mallin kontrabandë

Më 16 mars të këtij viti, Drejtoria e Doganave njoftoi publikisht se kishte pezulluar dhe dërguar për ndjekje penale 8 punonjës të Doganës së Kakavijës dhe 2 shoferë, pasi akuzoheshin se kishin futur trailera kontrabandë në kufi. Nga njoftimi zyrtar i asaj dite, sot që kanë plasur dyshimet për një kontrabandë të fuqishme cigaresh në doganën e Kakavijës të bën përshtypje fakti që në asnjë rresht nuk mësohet se çfarë mallrash industrialë përmbanin trajlerat, ndërkohë që në çdo njoftim të mëparshëm, Drejtoria e Doganave tregonte kujdes për detajimin e mallrave të kapura kontrabandë, nga mishi i derrit, xhinset e veshje të tjera, pijet alkoolike, ilaçe, etj., etj.

Në rastin e zbuluar dhe publikuar në mars, Drejtoria e Doganave bëri me dije vetëm se ishin 2 trajlera me mallra industriale, pa e përcaktuar se çfarë ishin në të vërtetë këto mallra. ?Departamenti Operativo-Hetimor, pranë Drejtorisë së Përgjithshme të Doganave, zbuloi dhe hetoi një veprimtari të organizuar kriminale të disa personave në bashkëpunim me punonjës të doganës së Kakavijës, të cilët kanë futur në territorin shqiptar mallra kontrabandë.

Nga hetimi i kryer u zbulua se në datën 26 Shkurt 2015, në Doganën e Kakavijës kanë kaluar dy automjete tip trailer kontrabandë, të cilët kishin në brendësi artikuj të ndryshëm industrial, duke shmangur kështu vlera të konsiderueshme të detyrimeve doganore. Njëkohësisht punonjësit e doganës kanë konsumuar veprën penale të kontrabandës, neni 175 dhe 25 të Kodit Penal. Nga kjo veprimtari e organizuar kriminale, e cila është kryer në bashkëpunim, Departamenti Operativo-Hetimor i Drejtorisë së Përgjithshme të Doganave, ka dërguar për ndjekje penale në Prokurorinë e Rrethit Gjyqësor Gjirokastër, për veprën penale të ?Kondrabandës?, punonjësit e administratës doganore bazuar në Nenin 175 dhe 25 të Kodit Penal?, bëri me dije Drejtoria e Doganave, duke vijuar më tej me emrat e punonjësve dhe masat ndaj tyre, por asnjë detaj se sa kg mallra ishin sekuestruar dhe çfarë ishin këto mallra, veshje, artikuj shkollorë, çanta, aksesorë etj.