Viti mbyllet me përballje elektrizuese, Serie A premton spektakël

26 Dhjetor 2024, 17:11, Sport CNA

Viti 2024 do të mbyllet me sfida interesante në Serinë A italiane, aty ku spektakli është i garantuar. Tre përballje direkte dhe disa ndeshje të tjera me peshë specifike mund të ndryshojnë balancat në garën për titullin kampion dhe zonat evropiane. Në krye të tabelës qëndron Atalanta, një skuadër që po demonstron një pjekuri dhe soliditet të paparë më parë, ndërsa rivalët kryesorë si Interi dhe Napoli janë gati për të përfituar nga çdo hap fals.

Skuadra e Gasperinit, e cila po udhëheq klasifikimin, ka treguar këtë sezon se është më shumë se një ekip simpatik i futbollit ofensiv. Humbja e sulmuesit Retegi për shkak të dëmtimit është një goditje, por bergamaskët kanë një organikë të pasur dhe janë të aftë të mbushin boshllëqet me sukses. Fitorja kundër Empolit ishte dëshmi e aftësisë së tyre për të përballuar presionin dhe për të siguruar rezultate pozitive. Por tani i pret një sfidë tjetër, një përballje e vështirë kundër Lazios në “Olimpico”, një ndeshje që do të vërë në provë ambiciet e tyre për titullin.

Lazio, nga ana tjetër, është një ekip i aftë për surpriza, me përjashtim të disfatës së rëndë në shtëpi kundër Interit. Bardhekaltërit mbeten një kundërshtar i fortë, veçanërisht në fushën e tyre. Një fitore ndaj Atalantës do të ishte një sinjal i qartë se edhe ata janë pjesë e garës për objektivat e mëdha.

Interi i Simone Inzagit ndodhet vetëm 3 pikë pas Atalantës dhe ka një ndeshje më pak. Një fitore në transfertën ndaj Kaljarit jo vetëm që do t’i ndihmonte të mbajnë presionin ndaj kryesuesve, por edhe të shkojnë në Superkupë me moral të lartë. Përballë një Kaljari që lufton për mbijetesë, zikaltrit pritet të shfaqin fuqinë e tyre, duke treguar se janë në një moment të shkëlqyer forme.

Ndërkohë, Napoli ka gjithashtu një mundësi të artë për të përfituar nga kalendari. Skuadra e Antonio Kontes pret në shtëpi Venecian, një kundërshtar modest në letër, dhe një fitore do t’i ndihmonte të ruanin hapin me rivalët. Me Atalantën, Interin dhe Napolin që kanë ndeshje më të favorshme, kjo xhiro mund të jetë një pikë kthese për garën në krye.

Kjo javë e fundit e vitit sjell edhe dy përballje të mëdha: Juventus-Fiorentina dhe Milan-Roma. Bardhezinjtë e Motës vijnë nga një fitore kundër Monzës, por janë ende në kërkim të stabilitetit pas një fillimi të vështirë. Fitorja ndaj Fiorentinës do të ishte një konfirmim se kanë kaluar krizat e brendshme dhe janë gati për të luftuar për zonën Champions.

Nga ana tjetër, Milani dhe Roma, dy nga skuadrat të mëdha të Serisë A, janë zhgënjimet e mëdha të këtij sezoni. Të dyja ekipet kanë vuajtur nga oshilacionet dhe rezultatet negative, dhe kjo përballje është një mundësi për të ndryshuar drejtimin e sezonit. Një humbje për secilën prej tyre do të ishte një goditje e rëndë për ambiciet e tyre, ndërsa një fitore mund të rigjallërojë shpresat për një pjesë të dytë më të mirë të kampionatit.