web counter
LEXO PA REKLAMA!

SHKARKO APP

App Store
Google Play

Gvozdenoviç falënderon shkodranët, Brdariç: Ishte ndeshje speciale

12 Maj 2024, 11:40, Sport CNA

Trajneri i Skënderbeut, Ivan Gvozdenoviç, ishte i emocionuar pas ndeshjes me Vllazninë, ku skuadra e tij siguroi "Final Four".

Skuadra korçare mori duartrokitje nga shkodranët në stadium pas sfidës dhe kjo është pritur shumë mirë nga tekniku i bardhekuqve, që nuk i kurseu falënderimet në daljen para mediave.

Gvozdenviç u shpreh i lumtur, ndërsa theksoi se shpreson që Vllaznia të shkojë në finale me Skënderbeun.

"Dua të falënderoj nga zemra tifozët shkodranë. Jemi shumë të emocionuar. Jam shumë i kënaqur për kualifikimin në 'Final Four'. Nuk ishim pesë herë më mirë se Vllaznia. Shkodranët kanë skuadër shumë të mirë dhe do Zoti të shkojë në finale. Jemi të lumtur dhe të kënaqur për këtë arritje. Të gjithë korçarët dhe unë kemi respekt për shkodranët dhe duartrokitja nga unë ishte normale", tha tekniku i korçarëve.

Në krahun tjetër, trajneri i Vllaznisë, Tomas Brdariç, deklaroi se ishte një ditë speciale për shkak se titullarët u lanë pushim dhe iu dhanë hapësira të rinjve.

"Ishte një ndeshje speciale, sepse lamë pushim titullarët dhe u dhamë mundësinë të rinjve të luajnë në Superiore. Jemi në një situatë të mirë dhe rezultati nuk ishte deciziv. Ishte një mundësi e mirë për të rinjtë, për të treguar cilësitë e tyre. Objektivi i parë i Vllaznisë ishte futja në "Final Four" dhe i dyti, kualifikimi në Evropë, që u arritën. Tani është gjithçka e hapur", u shpreh Brdariç.

Dy skuadrat do të mësojnë kundërshtarët e tyre në gjysmëfinale këtë të hënë, pas hedhjes së shortit nga Federata Shqiptare.





Lajmet e fundit nga