Prebiotikët, probiotikët dhe postbiotikët!

17 Tetor 2023, 18:04, Shëndeti Ilir Allkja

Prebiotikët, probiotikët dhe postbiotikët të gjithë mbështesin mikroflorën e zorrëve të trupit tuaj.

Nisur nga konfuzioni që ekziston po përpiqem që të tregoj se çfarë bën secili prej tyre, në mënyrë që të merrni një sqarim të plotë.

- Prebiotikët: Janë ushqim për bakteret tona të mira të zorrëve. Burime të shkëlqyera të tyre janë asparaget, bananet jeshile, angjinaret, zhardhokët e ndryshëm, karrotat, rrepat etj.

- Probiotikët: Janë bakteret e shëndetshme që jetojnë në zorrën tonë (lactobacilet). Ne kemi nevojë për balancën normale të këtyre për të tretur ushqimin tonë siç duhet si dhe për të mos patur infeksione mykotike, bakteriale në zorrë, sistemin geniale, lëkurë etj.

- Postbiotikët: Postbiotikët janë metabolitët e probiotikëve, ose përbërësit që rezultojnë nga aktiviteti probiotik në zorrë; fermentimi.

Ndërsa mikrobet e zorrëve konsumojnë fibra prebiotike, rezultati i fermentimit ose konsumit është ai që njihet si postbiotikë.

Janë bakteret tuaja që hanë dhe ‘fermentojnë’ fibra prebiotike. Postbiotikët më pas përdoren si lëndë djegëse për qelizat në muret e zorrëve dhe për bakteret në zorrën tuaj.

Por për çfarë ka nevojë zorra juaj?

Mënyra e vetme për të ditur me siguri se për çfarë kanë nevojë zorrët tuaja është duke bërë një test funksional laboratorik për të parë se ku qëndroni.

Kini vëmendjen:

- Nëqoftëse jeni mbipeshë, e megjithëse po mbani dietë nuk humbni atë ndoshta ju keni çekuilibër të florës intestinale.

- Nëqoftëse keni pagjumësi, ankth, dhimbje kyçesh, stomaku , çrregullim periodash, ndoshta ju keni probleme me florën e zorrëve.

- Nëqoftëse ju nuk po normalizoni dot vlerat e sheqerit në gjak, tensionin arterial, ju mund të keni probleme me florën e zorrëve tuaja.

- Nëqoftëse se ju vuani nga mykrat apo infeksionet e tjera të rrugëve gjenitale , ju mund të keni probleme me florën e zorrëve tuaja.

- Nëqoftëse ju keni përdorur antibiotikë, me siguri mikroflora e zorrëve tuaja është shkatërruar.

Këshilla ime: Mos i lini problemet tuaja shëndetësore të trashen; kontaktoni një mjek të besuar!