Pesë ilaçe të zakonshme që mund të shkaktojnë depresion

3 Qershor 2023, 21:20, Shëndeti CNA

Pesë ilaçe të zakonshme që mund të shkaktojnë

Foto ilustruese

Depresioni ka shumë shkaktarë. Faktorë të tillë si gjenetika familjare, mjedisi stresues, ndryshimet fizike, personaliteti dhe ndryshimet hormonale, mund të shkaktojnë depresion tek njerëzit. Megjithatë, shumë njerëz nuk e dinë se disa ilaçe që përdoren gjerësisht dhe që jepen me recetë nga mjeku mund të shkaktojnë gjithashtu depresion si një efekt anësor. Depresioni është një sëmundje shumë e zakonshme. Ai prek 1 në 6 persona gjatë jetës së tyre. Depresioni karakterizohet nga një humori i keq, si dhe mungesa e interesit dhe kënaqësisë në thuajse të gjitha aktivitetet e jetës së përditshme.

Fëmijët dhe adoleshentët e shfaqin zakonisht me nervozizëm, ndërsa tek të rriturit mund të shprehet përmes trishtimit. Këto simptoma mund të shoqërohen gjithashtu edhe me ndryshime në oreks, shqetësime të gjumit, mungesë energjie, si dhe ndjenjën e pavlefshmërisë dhe të fajit.

Po kështu, njerëzit mund të kenë vështirësi në përqendrim dhe të menduarit e turbullt, vështirësi në marrjen e vendimeve dhe mendime të këqija për vdekjen. Madje disa mund të kenë mendime dhe qëllime vetëvrasëse, apo edhe të bëjnë plane ose më keq akoma të përpiqen t’i japin fund jetës së tyre.

Sipas një studimi të publikuar në vitin 2018, më shumë se 1/3 e të rriturve në SHBA, marrin barna me recetë që mund të shkaktojnë depresion. Rreziku i depresionit të shkaktuar nga ilaçet, rritet nëse një person merr më shumë se sa një ilaç që ka depresionin të listuar si një efekt anësor i mundshëm.

Kur disa barna ndërveprojnë me njëra-tjetrën, ato krijojnë efekte të tjera anësore, dhe depresioni mund të jetë një prej tyre. është kjo një nga arsyet pse është e rëndësishme që të bisedoni me mjekun tuaj nëse jeni duke marrë disa barna në të njëjtën kohë. Sipas uebsajtit Medical Daily, 5 ilaçe mund të shkaktojnë depresion:

1. Beta-bllokuesit

Beta-bllokuesit rekomandohen zakonisht nga mjeku për njerëzit që vuajnë nga tensioni i lartë. Por ato përdoren gjithashtu për trajtimin e migrenës, rrahjeve të çrregullta të zemrës, anginës dhe dridhjeve. Por disa beta-bllokues si atenolol, metoprolol dhe carvedilol mund të shkaktojnë simptoma të depresionit.

2. Barnat hormonale

Shpeshherë, ndryshimet në nivelet e hormoneve tek gratë mund të shkaktojnë simptoma të depresionit. Përdorimi i kontraceptivëve hormonalë në formën e pilulave të kontrollit të lindjes dhe pajisjeve intrauterine, ose terapisë zëvendësuese të estrogjenit për të lehtësuar simptomat e menopauzës, mund të shkaktojë depresion si një efekt anësor.

3. Ilaçet për sëmundjen e Parkinsonit

Studimet kanë treguar se vetë sëmundja e Parkinsonit, lidhet me një rrezik të lartë të depresionit. Ilaçe të tilla si Levodopa ose Sinemet CR, përdoren për trajtimin e Parkinsonit. Këto barna mund të ndikojnë në gjendjen psikologjike të një personi, pasi ato mund të rrisin nivelet e dopaminës për periudha të gjata.

4. Kortikosteroidet

Shpesh quhen thjesht steroide, dhe përdoren për të trajtuar një sërë gjendjesh si puçrrat dhe gjendjet inflamatore, si lupusi apo artriti reumatoid. Përdorimi i steroideve mund të ndikojë tek nivelet e serotoninës, një kimikat i prodhuar nga truri që ndihmon në rregullimin e humorit.

5. Stimuluesit

Stimuluesit përdoren për të trajtuar çrregullimin e hiperaktivitetit të deficitit të vëmendjes (ADHD) dhe përgjumjen gjatë ditës për shkak të narkolepsisë, një çrregullim neurologjik që ndikon në ciklin e gjumit dhe zgjimit. Ato mund të çojnë në varësi, duke shkaktuar simptoma të tilla si lodhje dhe vështirësi për të fjetur, kur njerëzit ndalin pirjen e këtyre stimulantëve./ Përshtatur nga CNA.al