Buxheti 2023/ Manastirliu: Fishat e diabetit, falas për të moshuarit mbi 65 vjeç

9 Nëntor 2022, 16:18, Shëndeti CNA

Buxheti 2023/ Manastirliu: Fishat e diabetit, falas për të moshuarit

Ministrja e Shëndetësisë dhe Mbrojtjes Sociale, Ogerta Manastirliu

Qeveria do të financojë fishat e diabetit falas për të moshuarit mbi 65 vjeç. Lajmin e bëri të ditur Ministrja e Shëndetësisë dhe Mbrojtjes Sociale, Ogerta Manastirliu, gjatë prezantimit të projektbuxhetit të vitit 2023 në Kuvend.

“Pasi rimbursuam fishat e diabetit për fëmijët dhe të rinjtë deri në 25 vjeç, me buxhetin e ri, nga viti që vjen mbështesim të moshuarit +65 vjeç që vuajnë nga diabeti, duke rimbursuar fishat e diabetit falas dhe duke u kursyer të moshuarve të paktën 1 pension mujor në vit”, tha Manastirliu.

Duke folur për rritjen e buxhetit të shëndetësisë, Manastirliu tha se do të vijojë mbështetja për mjekët dhe infermierët.

“Për shëndetësinë dhe mbrojtjen sociale buxheti për 2023-shib është 95,1 miliardë lekë. Ky buxhet është dy herë më i lartë se buxheti i vitit 2013. Buxheti 2023 është buxheti i shtimit të vëmendjes ndaj mjekëve dhe infermierëve. Pas rritjes me 63% të pagave gjatë këtyre viteve, pagat do rriten me 7% gjatë 2023, me një efekt financiar vjetor 1,8 mld lekë dhe do të përfitojne rreth 19 mijë mjekë e infemierë të sistemit tonë shëndetësor”, tha Manastirliu.

Gjatë fjalës së saj në Kuvend, Ministrja e Shëndetësisë dhe Mbrojtjes Sociale tha se ky është buxheti i forcimit të mburojës sociale për njerëzit në nevojë.

“Jemi gati ta përforcojmë mburojën financiare për kategoritë në nevojë. Gjatë këtij viti ne rritëm 20% masën e Ndihmës Ekonomike, dyfishuam masën e ndihmës për gratë kryefamiljare me 2 fëmijë, pas dyfishimit të masës së Ndihmës Ekonomike për nënat me tre e më shumë fëmijë. Po kështu dyfishuam masën e ndihmës ekonomike për të moshuarit e vetmuar dhe pa pension social. Këto masa nuk janë mbështetje për një herë por do të jenë mbështetje e vazhdueshme dhe e qëndrueshme edhe për 2023-shin. Buxheti 2023 do të financojë nismën e mbështetur nga Këshillimi Kombëtar, një nismë që mbështet nënat e papuna me tre e më shumë fëmijë e me të ardhura familjare deri në 100 mijë lekë, duke i njohur si pune kontributive 5 vitet e para të rritjes së fëmijës së tretë e më shumë, e duke i subvencionuar shteti kontributet shoqërore e shëndetësore për këto vite”, tha Manastirliu.

Për shëndetësinë dhe mbrojtjen sociale buxheti për vitin 2023 është 95,1 mld lekë, ose mbi 4 mld lekë më shumë se buxheti i vitit aktual.

Buxheti 2023 garanton programet e shëndetit publik, duke financuar për herë të parë një program të ri, siç është vaksinimi kundër HPV, nga i cili përfitojnë 15 mijë vajza.

Gjithashtu garanton programet e parandalimit si ai i kontrollit mjekësor bazë, depistimit të kancerit të gjirit dhe kancerit të qafës së mitrës, garanton paketat shëndetësore falas, fuqizimin e shërbimit të urgjencës kombëtare si dhe vijimin e investimeve në shëndetësi, nga 60 qendra të tjera që do të rindërtohen në kujdesin parësor, tek investimet madhore në spitale nga veriu në jug./ B.A. - CNA.al