A mendoni se keni mjaftueshëm oksigjen?

5 Shtator 2023, 15:39, Shëndeti Ilir Allkja

Më poshtë do të gjeni 8 simptoma të mungesës së oksigjenit në trup.

Të kesh nivele normale të oksigjenit në trup është nevojë bazë për të jetuar.

Kur ju merrni frymë, nëpërmjet mushkërive oksigjeni lidhet me hemoglobinën që ndodhet në rruazat e kuqe të gjakut dhe shkon në çdo qelizë të trupit.

Oksigjeni është elementi vendimtar për organet, muskujt, indet dhe qelizat që prodhojnë energji.

Fatkeqësisht shumë individë përjetojnë mangësi të furnizimit me oksigjen, mangësi të cilat dëmtojnë gradualisht trurin, zemrën, mëlçinë etj.

Astma, emfizema, bronkoektazia, SPOK, fibroza pulmonare, anemitë etj, janë disa nga sëmundjet që kontribuojnë në uljen e oksigjenimit të trupit.

Duhanpirësit kanë gjithmonë nivele të kompromentuara të oksigjenit në gjak për shkak të uljes së kapacitetit të hemoglobinës për të lidhur oksigjenin.

Nivelet e larta të stresit, ankthit, atakut të panikut, rrisin nivelet e kortizonit, ventilimit dhe shkatërrojnë balancën e oksigjenit dhe CO2.

Gërhitja dhe apnea e gjumit pakësojnë gjithashtu nivelet e oksigjenit në gjak.

Personat që konsumojnë rregullisht ëmbëlsira, kanë një pH më të ulët të gjakut, për pasojë nivel më të ulët të oksigjenit.

Përgjithësisht mangësitë në ushqyerje mund të shkaktojnë anemi, për pasojë nivele të ulëta të oksigjenimit të indeve.

Në qoftë se nivelet e ulëta të oksigjenit në trup nuk korrigjohen, me kalimin e kohës shkaktojnë dëme të parikthyeshme në organet tuaja.

Në këtë shkrim dua t'ju orientoj për disa simptoma që orientojnë se mund të keni nivele të ulëta të oksigjinit në gjak:

- Etje për ajër. Pacientët ankojnë se nuk ngopen dot me ajër dhe hera-herës për bllokim në gjoks.

- Humbje të vetëdijes, marrje mendsh dhe lodhje, sidomos gjatë lëvizjes, ulje-ngritjeve etj. Ka raste ankojnë errësim të shikimit, i cili rikthehet pas çlodhjes.

- Shenjë tjetër e mungesës së oksigjenit në gjak janë aritmitë, të cilat manifestohen së shpeshti me takikardi.

- Krampe muskulore, mpirje të shpatullës, krahut të majtë, dhimbje gjoksi. Këto shenja orientojnë se muskuli i zemrës suaj (miokardi) po vuan për oksigjen. Duhet urgjent vizitë mjekësore!

- Rëndim të këmbëve. Vështirësi në ngjitje shkallësh ose gjatë shëtitjes në një malore. Kjo është shenjë e oksigjenimit të papërshtashëm të muskujve të këmbëve.

- Thonjtë e gishtave tuaj. N.q.s. thontë tuaj janë të zbehtë dhe paraqesin çngjyrosje, plasaritje, këto mund të jenë shenja anemie. Anemia kufizon hemoglobinën, e cila është thelbësore për transportin e oksigjenit.

- Shfaqja e nuancave blu, të ngjashme me njollat hemorragjike në lëkurën e trupit tuaj është shenjë e qartë që ju mund të jeni duke vuajtur mangësi të furnizimit me oksigjen.

- Konfuzioni, letargjia, lodhja kronike, acarimi i shpejtë nervor janë simptoma që duhet t`ju orientojnë që trupi juaj nuk po oksigjenohet siç duhet.

Nëse ju përjetoni ndonjërën nga këto simptoma, mos hezitoni të vizitoheni te një mjek.