E fundit!

11:38 Aktualitet

Dalin mesazhet/ Deputetët e PD-së kundër bojkotit të seancës në Kuvend

Vendimi i Partisë Demokratike për të mos marrë pjesë në se...

A duhet të shqetësoheni për kollën e fëmijëve?!

3 Dhjetor 2023, 08:41, Shëndeti Ilir Allkja

Në praktikën time mjekësore kam vënë re që prindërit tremben shumë kur fëmija i tyre ka një kollë të lehtë e akoma më shumë kur kjo kollë është e fortë, e keqe dhe kërkojnë doemos shurupe e gjilpëra për ta ndalur atë.

Por a duhet doemos të marrim ilaçe për fëmijën me kollë?

A janë barnat mënyra normale e trupit për të mbrojtur mushkëritë e fëmijës?

Kollitja apo shuruprat i mbajnë mushkëritë të pastra?

Duhet të dimë që kolla është një mekanizëm mbrojtës. Nëse fëmija ka rrjedhje apo bllokim hundësh, një pjesë e sekrecioneve mund të rrjedhë pas hundës, në faring,e më pas në laring e trake, duke irrituar bronkiolat (degëzimet e vogla të mushkërive) dhe të shkaktojë kollë. Pra kolla është një akt reflector mbrojtës për të pastruar mushkëritë dhe për të nxjerrë jashtë sekrecionet.

Medikamentet që frenojnë kollën nuk rekomandohen për fëmijët nën moshën 6 vjeç, sipas udhëzimeve të reja të rishikuara nga Akademia Amerikane e Pediatrisë. Kjo për arsye sepse ato zakonisht nuk funksionojnë, nuk sjellin asnjë dobi, përkundrazi ndonjëherë japin efekte anësore serioze.

Unë kam provuar (por jo pak prej jush) se vetëm një lugë çaji mjaltë çdo ditë mund të ndihmojë shumë më tepër duke qetësuar fytin e irrituar dhe të ndalojë kollën (mjafton të jetë mjaltë i vërtetë, natyral). Mbani mend: për shkak të rrezikut të botulizmit, mjalti nuk duhet të përdoret për fëmijët nën moshën 1 vjeç.

Disa nga ilaçet për kollën thjeshtë e frenojnë kollën, në vend që ta trajtojnë shkakun e saj.

Shkaku i kollës mund të jetë tonsiliti, faringiti, laringiti, bronkiti, pneumonia, gjendje alergjike, apo edhe ndonjë trup i vogël në rrugët e frymëmarrjes.

Lutja ime: Mos blini shurupra pa recetë në farmaci!

Mos e merrni më qafë fëmijën tuaj duke i frenuar kollën, kështu ju mund t'i maskoni një sëmundje serioze! Një kollë e lehtë 3, 4 apo 5 ditë nuk ka nevojë për barna, në qoftë se kolla nuk lehtësohet shkoni te pediatri!

Duhet të merrni parasysh se barnat që ju blini direkt në farmaci kanë edhe efekte të tjera afatshkurtra të tilla si:

- Paranojë, konfuzion.

- Djersitje të tepruar.

- Nauze dhe të vjella.

- Dhimbje barku.

- Rrahje të parregullta të zemrës dhe tension të lartë të gjakut.

- Tharje të lëkurës, kruajtje dhe skuqje të fytyrës.

- Reaksione alergjike, etj.

Dhe mos harroni anën tjetër të medaljes, kompanitë farmaceutike fitojnë triliona dollarë çdo vit duke shitur ilaçe për kollën!

Kujdesuni për veten dhe për fëmijët tuaj!