Dhjetori festiv në Korçë/ Qytetarët dhe turistët të entuziazmuar

3 Dhjetor 2023, 15:59, Qyteti im CNA

Dhjetori festiv në Korçë/ Qytetarët dhe turistët

Fundjava ka nisur më së miri në qytetin e Korçës, ku mbrëmjen e djeshme u organizua eventi i ndezjes së dritave për dhjetorin festiv. Muaji që pritet me padurim jo vetëm nga korçarët, por edhe vizitorët që në çdo moment pushimi, zgjedhin juglindjen për të kaluar disa ditë me familjen dhe shoqërinë.

Atmosfera e ngrohtë, dritat shumëngjyrëshe në çdo bulevard kryesor, në sheshin para Katedrales, në pedonalen e qytetit si edhe dekori në pazarin e vjetër, ka bërë që të ketë vërshim të turistëve gjatë kësaj të shtune. Ata kanë treguar për CNA TV ndjesinë që marrin nga kjo atmosferë dhe nga Korça e bukur, duke premtuar se do të rikthehen sërish.

"Atmosfera e shkëlqyer, e mrekullueshme, me shumë drita e shumë njerëz. Ky është vetëm fillimi me aq sa kuptoj unë. Do doja të isha pjesë e aktiviteteve, por shumë shpejt më duhet të largohem. Kam ardhur vetëm për një kohë të shkurtër e më duhet të kthehem në Chicago. Jam lindur e rritur në Korçë, shumë njerëz që i kam pasur nuk i kam, njerëzit janë larguar por qyteti mbetet ai që është."

Dhjetori festiv në Korçë/ Qytetarët dhe turistët

"Unë vij nga Tirana. Atmosfera shumë e bukur dhe shumë e gëzuar. Tirana ka bukurinë e vet, dhe Korça të sajën. Jam shumë e kënaqur. Nesër mbrëma do të largohem. Gëzuar gjithë shqiptarëve 2024 për shumë vjet."

"Ne jemi nga Tirana. Kemi ardhur sot me pushime 2 ditë por u kënaqëm. Qenka shumë bukur. Jemi kënaqur nga ambienti e mikpritja."

"Jetoj në Verona, Korça është si Verona, shumë e bukur, më pëlqen. Hera e parë që vij, por nëse më jepet rasti do vij prapë. Ju përshëndesim, pushime të mbara, dhe gëzuar."

Edhe korçarët kanë treguar me shumë kënaqësi atmosferën, që e gjejnë çdo vit e më mirë në qytetin e bukur të Korçës.

Dhjetori festiv në Korçë/ Qytetarët dhe turistët

"Drita të bukura, njerëz shumë të gëzuar. Jemi vendalinj nga Korça. Këtë vit më duket shumë bukur, edhe vitet e tjera ka qenë bukur, por sot më duket akoma më e bukur."

"Jemi nga Korça. Atmosferë shumë e bukur, na kënaqet zemra, edhe për ne korçarët por edhe për ata që na vizitojnë. Ne turistët i mirëpresim e duam që të vijnë sa më shumë."

Të lumtur për ndezjen e dritave kanë qenë edhe fëmijët, të cilët kanë uruar për festa të gëzuara e të mbara për të gjithë.

Në fjalën e tij për mediat, kryetari i Bashkisë së Korçës Sotiraq Filo ka treguar rreth organizimit të këtij eventi.

Dhjetori festiv në Korçë/ Qytetarët dhe turistët

"Përveç atmosferës që krijohet nga zbukurimet e fundvitit do te kemi dhe një kalendar të ngjeshur me aktivitete artistike e kulturore në teatër, në Pazarin e Vjetër, pra Korça do të kthehet në epiqendrën e festimit të festave të fundvitit. Kemi disa ndryshime në elemente të dekorit, në Pazarin e Vjetër është një dekor fantastik dhe aty do të zhvillohen edhe një pjesë e konsiderueshme e aktiviteteve artistike kulturore."

Qyteti i Korçës ka qenë dhe do të mbetet destinacioni kryesor që zgjedhin turistët për të kaluar festat e fundvitit. Prej muajit nëntor janë prenotuar të gjitha hotelet e bujtinat në këtë qytet, çka tregon interes shumë të lartë për të shijuar atë çka ofron Korça./ CNA TV