web counter
LEXO PA REKLAMA!

SHKARKO APP

App Store
Google Play

E fundit!

x

Tensionet në Komisionin Hetimor/ Beqaj hyn në mbledhje pa u thirrur, “përplaset” me opozitën

14 Nëntor 2024, 08:33, Politikë CNA

Tensionet në Komisionin Hetimor/ Beqaj hyn në mbledhje pa u thirrur,

Mbledhja e Komisionit Hetimor për koncesionet në Shëndetësi ka vijuar me debate të ashpra deri në orët e para të mëngjesit.

Palët nuk gjetën dakordësi, pasi opozita kërkonte me ngulm që të dëshmonin edhe kryeministri Edi Rama me Vilma Nushin.

Kjo bllokoi marrjen në pyetje të ish-ministrit të Shëndetësisë, Ilir Beqaj, i cili priti në ambientet e Kryesisë së Kuvendit.

Megjithatë, veprimi i Beqajt ka shkaktuar edhe me tepër tension, pasi ish-ministri hyri në sallën e mbledhjes pa u thirrur.

Ai debatoi me kryetaren e Komisionit, Albana Vokshi, dhe me deputeten Ina Zhupa, të cilat i kërkuan të dalë menjëherë jashtë.

Beqaj përqeshi deputetet dhe më pas u largua nga salla, ndërsa deputetet kërkuan marrjen e masave nga Policia e Burgjeve.

Në orën 02:20 mbledhja u mbyll nga kryetarja Albana Vokshi.


Debatet:

Vokshi: Kush je ti more, kush je ti që hyn ashtu?! Urgjent policia ta kthejë në burg Ilir Beqajn. Guxon të hyjë në atë mënyrë në sallën e mbledhjeve të Komisionit. Sekretaria njoftoni policinë. Çojeni tani. Urgjent të vijë policia!

Zhupa: Nuk mund të hyjë ai dhe të na kërcënojë ne. I keni dhënë liri të livadhisë në Kryesinë e Kuvendit.

Spaho: Ndërprisni mbledhjen, i thoni policisë ta marrë.

Vokshi: Vjen ai dhe kërcënon, ju si nuk flisni?! Si mundet të hyjë ai ashtu? I japin garanci këta.

Spaho: Të merret masë ndaj avokatit, punonjësve të Gardës që e lejuan.

Vokshi: Ju lutem shumë, që ta kuptojë publiku. Ai person që erdhi i shoqëruar nga Policia e Burgjeve bredh i lirë në të gjitha ambientet, ka futur hunj, drunj, mjete të forta dhe është lejuar, i lirshëm që të shkojë ku të dojë. Futet në këtë mbledhje bashkë me avokatin dhe u lejua dhe nga policia dhe nga Garda. Ky është një skandal. Garda duhet të marrë masa për atë djalinqë e la të hynte.

Spaho: Pamjet e kamerës duhen administruar dhe duhet të informohet opinioni publik.

Vokshi: Si s’të vjen turp ty dhe gjithë të tjerëve. Ti mos guxo të ma bësh mua ashtu, të të vijë turp ty dhe të gjithë ju që nuk reagoni. Turp t’ju vijë. Futet ai me pranga dhe na kërcënon. Nuk është i lirë ai të bëjë çfarë të dojë. Ai duhet të ishte i mbyllur në një sallë. Të guxojë Ilir Beqaj dhe të futet e të kërcënojë deputetët e opozitës është skandal, askush nga ju nuk guxon të flasë. Çfarë do bësh?

Ilir Metaj: Ty s’kam çfarë të bëj.

Vokshi: Ti po kërcënon. Po ça kujtoni ju. Ik merr një dajre në dorë dhe një fyell se nuk e ke vendin këtu.

Ina Zhupa: Juve t’u vijë turp se dhe po të ishte cilido dëshmitar, asnjë nuk lejohet të hyjë këtu brenda. Ai hyri dhe kërcënoi deputetët pse i thamë të zbatojë ligjin. Juve t’ju vijë turp se jeni palë. Ju guxoni ta lini Ilir Beqajn që të livadhisë i lirë në Kryesinë e Kuvendit pa pyetur për polici, për Gardë. Ne kemi celularët, nuk lejohemi të kërcënohemi nga asnjë i burgosur dhe as Edi Rama.

Vokshi: Vajta vetë dhe i thashë personelit të Policisë së Burgjeve që ta largojë urgjentisht nga ambientet e Kryesisë së Kuvendit. Nuk ka ndodhur ndonjëherë një skandal kaq i madh që të guxojë një dëshmitar, edhe i zakonshëm të hyjë dhe të kërcënojë deputetët e opozitës. Nuk ka ku shkon më. Për çfarë po rrimë ne këtu. Çfarë duhet të ndodhë tjetër. Unë e konsideroj të mbyllur mbledhjen e sotme. Nesër do ftoja kryesinë e komisionit që të mblidhemi, të bëjmë shkresat përkatëse që t'ua dërgojmë të gjitha institucioneve, gardës, Drejtorisë së Burgjeve, ministrit të Drejtësisë, ministrit të Brendshëm, kryetares së Parlamentit, Kryeministrisë që t’i tregojmë skandalin që ka ndodhur.

Ndrecaj: Mbledhjen nuk mund ta mbyllni ju.../ CNA





Lajmet e fundit nga