“SPAK të hetojë Benet Becin”/ Doshi: Në Shkodër kemi 3 mandate të sigurta

8 Maj 2025, 09:27, Politikë CNA

“SPAK të hetojë Benet Becin”/ Doshi: Në Shkodër

Nga Vau i Dejës, ku zhvilloi takimin e radhës elektoral, kryetari i PSD-së, Tom Doshi, hodhi akuza të forta ndaj kryebashkiakut të Shkodrës, Benet Beci. Doshi tha se socialdemokratët në këtë qark kanë të sigurta 3 mandate.

“I marrim në Shkodër 3 mandate sepse vetë socialistët janë mërzitur me mënyrën e qeverisjes. E kemi një kryetar bashkie në Shkodër, i cili ishte ankuar edhe te kryeministri sepse Këshilli Bashkiak nuk e ka kaluar pikën e menaxhimit të hapësirave publike në plazhin e Velipojës sepse kompania është e gruas së tij. E ka vendosur emrin 'Bio Strajca', sot e mbrapa tani ju duhet ta thirrni 'Benet Strajca'. 'Benet Strajca' ke vjedhur boll, nuk të beson më Shkodra. Nuk ndikon më presioni kundër votuesve të PSD-së. Edhe socialistët janë bërë me ne. Ne në Shkodër do të kemi sërish zgjedhje të parakohshme në bashki, por ne nuk do t’ia lëmë bashkinë Sali Berishës. Bashkinë do ta ketë sërish Partia Socialiste, por jo me njerëz të korruptuar si Beneti. Pa PSD nuk do të fitohen kurrë as bashkitë e Shkodrës, as Vau i Dejës, as Malësia e Madhe”,-tha Doshi.

Kreu i PSD-së tregon se Benet Beci është i filmuar teksa diskuton shitblerjen e votës me kandidatët e tjerë socialistë dhe i bën thirrje SPAK-ut ta hetojë këtë krim zgjedhor.

“SPAK të hetojë Benet Becin”/ Doshi: Në Shkodër

“Drejtori i spitalit të Shkodrës u kërkon punonjësve: në fletën e votimit nuk do të vendosësh kryq, por plus dhe kështu e dimë nëse ke votuar PS. O të mjerë, si mendoni se i bëni kështu presion popullit të Shkodrës për të mos votuar? O i mjerë, unë të solla në këtë bashki. O hajdut!

Pas zgjedhjeve do të shkosh në burg. 'Benet Strajca' një ditë kishte mbledhur krerët e bashkive dhe kandidatët për deputetë dhe e kanë filmuar Benetin. I thotë: Po bleni votat e socialistëve!

Ky është krim zgjedhor dhe këtë do t’ia dorëzojmë SPAK-ut.

Deputeti Frrok Gjini i thotë: 'O Benet ka ardhur Çim Sterkaj të blejë vota te djali i axhës tim'. Çfarë po bëhet kështu? Kështu duan këta t’i marrin mandatet?!

U bëj thirrje socialistëve dhe demokratëve të votojnë PSD-në. Ne jemi mbështetës të Partisë Socialiste, por nuk mbështesim ministrat e korruptuar që do të shkojnë në burg prapë nesër. Vetë kryeministri dhe kryetari i tyre ka thënë që unë nuk jam avokati i atyre që bëjnë korrupsion. Dhe ne për këtë po flasim!

Pa ne nuk ka mazhorancë. T’i bëjnë llogaritë si të duan Partia Socialiste sepse me Sali Berishën ne s’kemi lidhje”,-tha Doshi.

Para qytetarëve të Vaut të Dejës, Doshi tha se PSD është e vetmja alternativë për shqiptarët pasi ka një program të qartë për shtresat në nevojë./CNA