Silvi Caka, zëvendësministre/ Partia e Lirisë: Nuk ndalojmë askënd të lëpijë atë që ka pështyrë

25 Shtator 2025, 19:16, Politikë CNA

Silvi Caka, zëvendësministre/ Partia e Lirisë: Nuk ndalojmë

Zëdhënësja e Partisë së Lirisë, Jasmira Memelli ka reaguar me tone të forta lidhur me largimin e Silvi Cakës, e cila ka marrë postin e rëndësishëm në Ministrinë e Brendshme si zëvendësministre.

Sipas Memellit, Caka ka braktisur vlerat e Lirisë dhe Demokracisë për të përfituar një pozicion në “Qeverinë e krimit dhe të korrupsionit”.

Në deklaratën e publikuar në rrjetet sociale dhe faqen zyrtare, ajo nënvizon se akti i Cakës nuk përfaqëson largim nga struktura partiake, por nga morali, integriteti dhe parimet që përfaqëson kjo forcë politike.

Sipas saj, Caka është larguar mbi një vit më parë, me pretendimin se do të ndiqte Shkollën e Magjistraturës, por në fakt ka aplikuar për atë që partia e cilëson si “Shkollën e Korrupsionit, Krimit dhe Vesit”.

Memelli thekson se është më e vendosur se kurrë për të vazhduar luftën pa kompromis kundër regjimit të Edi Ramës, të cilin e akuzon për shpopullimin e vendit dhe korrupsion të skajshëm.

“Kur dikush zgjedh të braktisë vlerat e Lirisë dhe Demokracisë për një karrige të pa vlerë në Qeverinë e krimit dhe të korrupsionit, nuk largohet nga Partia e Lirisë, por nga morali, integriteti dhe parimet.

Nuk ndalojmë askënd të lëpijë atë që ka pështyrë, apo të pështyjë fytyrën e vet.

As të nëpërkëmbë edhe gjakun e familjes të derdhur për vlerat e shenjta të Lirisë.

Këto janë zgjedhje personale, që flasin më shumë se çdo fjalë.

Ka mbi një vit që S.C ka dhënë dorëheqjen për të ndjekur gjoja Shkollën e Magjistraturës, që në fakt rezultoi aplikim për në "Shkollën" e Korrupsionit, Krimit dhe Vesit.

Partia e Lirisë është më e vendosur se kurrë në mbrojtjen dhe jetësimin e kauzave të saj madhore ekzistenciale kombëtare, për të vazhduar pa kompromis luftën parimore dhe patriotike, krah për krah me opozitarët e vërtetë dhe me të gjithë shqiptarët e ndershëm, për t'i shkurtuar ditët regjimit kriminal të Edi Ramës që ka shpopulluar vendin dhe po rrjep pa mëshirë popullin me korrupsionin skizofrenik”, ka deklaruar zëdhënësja e PL-së, Memelli./ CNA