web counter
LEXO PA REKLAMA!

SHKARKO APP

App Store
Google Play

Rama në Kuvend: Pensionistët janë kryefjala e këtij buxheti dhe mandati

19 Nëntor 2025, 12:06, Politikë CNA

Rama në Kuvend: Pensionistët janë kryefjala e këtij buxheti

Kryeministri Edi Rama ishte sot i pranishëm në seancë plenare ku ka folur lidhur me buxhetin për vitin 2026. Rama u shpreh se kryefjala e këtij buxheti dhe mandati janë pensionistët.

Ai theksoi gjithashtu se nuk ka ndryshuar qëndrimi i qeverisë se deri në vitin 2029, biznesi i vogël nuk do të paguajë tatim fitimi. Kryeministri tha më tej se Shqipëria ka nivelin më të lartë të biznesit pa TVSH në të gjithë Europën.

"Në ndërkohë ky buxhet është një buxhet historik për Partinë Socialiste, sepse për herë të parë adreson në mënyrë domethënëse dhe të qëndrueshme përmes një angazhimi financiar afatmesëm prej 1.7 miliard eurosh rritjen e mbështetjes së pensionistëve dhe e mira e kësaj pune që gjithmonë vjen pastaj në favorin tonë është se fjalët i merr era, faktet mbeten dhe në ndërkohë ato që dëgjojnë njerëzit nga foltorja apo nga tryezat e këtij parlamenti kanë mundësi t’i vërtetojnë në muajt dhe në vitet që vijnë, siç i kanë vërtetuar të gjitha ato që ne kemi thënë. Kështu që sa më shumë do të thuhet që ne nuk po i rrisim pensionet, aq më shumë pensionistët do të binden se nuk ka asnjë alternativë tjetër në Republikën e Shqipërisë për ta dhe për nipërit dhe mbesat e tyre përveç Partisë Socialiste të Shqipërisë. Vijojmë me Mbrojtjen Shoqërore.

Mbrojtja Shoqërore arrin sot me këtë buxhet në 257 miliard lekë ose me një rritje prej 11.6 miliard, që e thënë ndryshe janë 116 milion euro. Kjo shumë për Mbrojtjen Sociale, ndërkohë që nga një anë varfëria ulet, nga ana tjetër papunësia ulet është më shumë sesa dyfishi i mbrojtjes që kishin shqiptarët kur ne morëm detyrën.

Më tutje, pensionistët janë kryefjala e këtij buxheti dhe do të jenë kryefjala e këtij mandati, por pa diskutim pa harruar edhe ata që vazhdojnë të jenë në skemën e ndihmës ekonomike, pa harruar përfituesit si persona me aftësi të kufizuara dhe pa harruar edhe domosdoshmërinë për një qasje të re dhe një shtysë të re në aspektin e strehimit, e duke mbetur besnikërisht pranë të gjitha familjeve të reja, me vazhdimësinë e bonusit të bebes.

Nga ana tjetër jemi sot në një tjetër vit, me një tjetër buxhet dhe me një tjetër paketë fiskale, por mbetemi besnikërisht të palëvizshëm nga pozicioni ynë, se deri në vitin 2029, biznesi i vogël nuk do të paguajë tatim fitimi dhe atyre që flasin për varfëri dhe që flasin për papunësi dhe që flasin për taksa, dua t'ju them se Shqipëria ka nivelin më të lartë të biznesit pa TVSH në të gjithë Europën. Deri në 100 mijë euro xhiro biznesi nuk paguan as tatim fitimi, as të TVSH, ndërkohë që deri në 140 mijë euro nuk paguan vetëm tatimin e fitimit dhe në këtë pikë jemi pa diskutim, jo vetëm shumë më lartë në të gjithë rajonin, në mbështetje të biznesit të vogël, por me herë mjafton t'ju them që pragu i TVSH-së për biznesin e vogël në vendin fqinj, Maqedoninë e Veriut është 16 mijë euro", tha Rama. /CNA





Lajmet e fundit nga