Rama në Izrael/ Qori: Na ka poshtëruar si vend dhe si popull, Netanyahu duhet të arrestohet

27 Janar 2026, 11:09, Politikë CNA

Rama në Izrael/ Qori: Na ka poshtëruar si vend dhe si popull,

Drejtuesi i Lëvizjes “Bashkë”, Arlind Qori, në një studio televizive ka folur për vizitën e kryeministrit Rama në Izrael. Qori tha se referuar Statusit të Romës, të ratifikuar në vitin 2023, nëse kryeministri izraelit, Netanyahu, vjen në Shqipëri, duhet të arrestohet.

Kjo për shkak se kryeminsitri izraelit këkrohet nga Gjykata Penale ndërkombëtare për krime kundër njerëzimit dhe krime lufte.

Sa i përket vizitës së Ramës në Izrael, Qori tha se Rama është i gatshëm të bëjë gjithçka për të përfituar nga politika botërore.

Qori e cilësoi vizitën e Ramës në Izrael si poshtërim për Shqipërinë dhe shqiptarët, pasi me këtë vizitë nuk respektoi detyrimet e vendit tonë bazuar në të drejtën ndërkomëbtare.

“Netanyahu është nën akuzë nga Gjykata Ndërkombëtare e Drejtësisë për gjenocid dhe shumë organizata të të drejtave të njeriut. Madje edhe në Izrael kanë dalë në përfundimin se qeveria e Netanyahu-t dhe aparati ushtarak kanë kryer gjenocide në Gaza. Netanyahu kërkohet edhe nga Gjykata Penale Ndërkombëtare, për krime lufte dhe krime kundër njerëzimit. Nëse në dimensionin e parë Shqipëria ka detyrim moral për të qenë në krahun e viktimave dhe të shtypurve, në aspektin e dytë ka edhe disa detyrime ligjore. Në 2003, Kuvendi i Shqipërisë ka ratifikuar Statutin e Romës, që njeh juridiksionin e Gjykatës. Nëse Netanyahu vjen në Shqipëri, duhet të dorëzohet përpara kësaj gjykate.

Midis këtyre dy aspekteve, detyrimit nga e drejta ndërkombëtare dhe tekat e Ramës për të dalë me një personazh që janë të paktë liderët botërorë që dalin, Shqipëria duhet të ruante reputacionin e vet.

Arsyeja pse Rama e bën këtë gjë, besoj se kryesorja ka të bëjë me frikën që ka nga institucionet e reja të drejtësisë për akuzat për korrupsion. Është i gatshëm të bëjë gjithçka në arenën ndërkombëtare për të përfituar ndonjë influencë nga politika e madhe botërore. Nuk gjej asnjë arsye tjetër pse kryeministri i Shqipërisë takohet me një personazh, që nuk është një kryeministër i çfarëdoshëm, por është i akuzuar nga Gjykata Penale Ndërkombëtare, juridiksionin e së cilës e njeh. Edi Rama na ka poshtëruar si vend dhe si popull, kur nuk respekton viktimat e panumërta, flitet për 70 mijë viktima, shumë prej të cilëve fëmijë. Nuk respekton as detyrimet që ka Shqipëria bazuar mbi të drejtën ndërkombëatre.

Është detyrim që shteti duhet ta zbatonte dhe kryeministri nuk mund t'i lejojë vetes të dalë dhe të buzëqeshë me një personazh politik të akuzuar për gjëma, krime kundër njerëzimit dhe krime lufte. Këto nuk janë opinione, por janë akuza zyrtare. Dua t’ju vë në dukje faktin që prej vitesh Netanyahu nuk takohet me shumë prej udhëheqësve të shteteve demokratike, këta refuzojnë të takohen me të, ka një peshë të madhe morale, një takim i tillë, apo legjitimimi i politikave të Netanyahu-t, qeverisë së tij të ekstremit të djathtë", tha Qori.