web counter
LEXO PA REKLAMA!

SHKARKO APP

App Store
Google Play

Rama largoi Frida Krifcën pas skandalit të pezullimit të fondeve nga BE

4 Shtator 2023, 20:35, Politikë CNA
Rama largoi Frida Krifcën pas skandalit të pezullimit të fondeve
Frida Krifca

Kryeministri Edi Rama njoftoi sot ndryshimet në kabinetin qeveritar, të paralajmëruara prej disa javësh. Mes ministrave të larguar është edhe Frida Krifca.

Frida Krifca u emërua ministre e Bujqësisë dhe Zhvillimit Rural në shtator të 2021-it.

Ajo u shkarkua nga kryeministri Edi Rama vetëm disa javë pasi BE pezulloi fondet për bujqësinë.

Lajmi asokohe u konfirmua nga delegacioni i BE-së në Shqipëri, i cili tha se Komisioni Evropian kishte pezulluar rimbursimet ndaj autoriteteve shqiptare për shpenzimet e kryera në kuadër të programit IPARD II.

Kjo masë erdhi si rrjedhojë e hetimeve për korrupsion në lidhje me zbatimin e programit IPARD II në Shqipëri.

"Komisioni Evropian ka informuar qeverinë shqiptare se ka marrë masa paraprake bazuar në informacionin fillestar të dhënë nga Zyra Evropiane Kundër Mashtrimit [OLAF], pas një hetimi mbi akuzat për korrupsion në lidhje me zbatimin e programit IPARD II.

Si masë parandaluese për mbrojtjen e interesave financiare të Bashkimit Europian, Komisioni Europian ka ndërprerë përkohësisht rimbursimet ndaj autoriteteve shqiptare për shpenzimet e kryera në kuadër të programit IPARD II.

Komisioni Evropian nuk mund të komentojë mbi asnjë gjetje të mundshme të OLAF-it për zbatimin e programit IPARD II (2014-2020) në Shqipëri. Hetimi i OLAF-it vazhdon.

Kur OLAF të dorëzojë raportin përfundimtar, Komisioni Evropian do të informojë autoritetet shqiptare dhe, bazuar në gjetjet e raportit, do të marrë çdo masë të mëtejshme të nevojshme për të mbrojtur interesat financiare të Bashkimit Evropian", njoftoi delegacioni i BE-së më 19 korrik.

Ministria e Bujqësisë reagoi me nxitim dhe tha se programi i mbështetjes nuk ishte ndërprerë, por ishte pezulluar vetëm një faturë aktuale e rimbursimit nga DG AGRI për një pjesë të shpenzimeve të radhës. Madje, ministria e cilësoi këtë proces krejtësisht administrativ.

“Autoritetet shqiptare janë vënë në dijeni të një pezullimi të faturës aktuale të rimbursimit nga DG AGRI për një pjesë të shpenzimeve te radhës. Ky është një proces krejtësisht administrativ që lejon riverifikimin e sistemeve të kontrollit nga strukturat e akredituara të cilat do të marrin masat e nevojshme me qëllim vijimin normal të rimbursimit nga BE. Keto janë procedura normale të Bashkimit Europian në kushtet kur ka nevojë të verifikohen shpenzime të dyshuara për aktivitet jo konform rregullave të përcaktuara”, deklaroi ministria.

Vetë Krifca u tentua të justifikohet në Parlament duke thënë se parregullsi apo shpërdorime të ngjashme me fondet IPARD janë gjetur edhe në vende si Gjermania, Franca apo Holanda.

“Nga të 27 vendet e Bashkimit Evropian vetëm dy prej tyre nuk ka pasur parregullsi apo shpërdorim po të doni të fondeve. Gjermania, Franca, Italia, Spanja, Holanda, Belgjika dhe po marr vetëm vende të zhvilluara, janë vetëm disa nga vendet ku janë gjetur problematika të ndryshme dhe secila nga këto vende është detyruar të rimbursojë fondet në Komision”, tha ajo.

Por Krifca u përgënjeshtrua nga Komisioni Evropian përmes një zëdhënësi.

“Nuk ka pasur raste të ngjashme”, shkruhet në përgjigje, duke theksuar se pezullimi është një masë parandaluese për të mbrojtur interesin financiar të BE-së, teksa hetimi i OLAF vazhdon.

Nuk është e konfirmuar nëse ka qenë kjo arsyeja e shkarkimit të ministres së Bujqësisë, por fakt është se skandali i pezullimit të fondeve të BE-së për shkak të korrupsionit ngjalli shqetësim dhe reagime të shumta./ CNA





Lajmet e fundit nga