web counter
LEXO PA REKLAMA!

SHKARKO APP

App Store
Google Play

E fundit!

x

Çështjet që "tensionuan" Parlamentin/ Nga McGonigal tek imuniteti i Ahmetajt dhe Berishës

2 Janar 2024, 09:30, Politikë CNA

Çështjet që "tensionuan" Parlamentin/ Nga McGonigal

Viti 2023 për Kuvendin e Shqipërisë ishte një vit me plot sfida të pakapërcyeshme. Ndasitë e opozitës transferuan debatin e brendshëm edhe në sallën e seancave plenare, çka favorizoi mazhorancën.

Nga ana tjetër, projektligje të rëndësishme vijuan të zvarriten nën mburojën e proceduarave. Reforma Zgjedhore, Avokati i Popullit, Amnistia Penale, Amnistia Fiskale, Ligji Për Lojërat e Fatit nuk gjetën rrugën, por vijojnë të flenë në sirtarët e Kuvendit, ndonëse partitë politike i sollën si kauza të tyre në nisje të sesionit.

Çështja “McGonigal”

Të hënën e 16 janarit 2023 kur dhe nisi sesioni politik i vitit 2023, dosja e ish-zyrtarit të FBI-së, Charles McGonigal, ka ‘trazuar ujërat’ në politikën shqiptare dhe u kthye në një ‘mollë sherri’ në Kuvend mes opozitës dhe mazhorancës. Opozita me vendosmëri kërkonte që të ndryshonte rendi i ditës në parlament dhe të futet në diskutim takimi i kryeministrit Edi Rama me ish-zyrtarin e FBI-së, McGonigal. Në atë kohë kërkesa u rrëzua me pretendimin se mbante firmën e Sali Berishës, për të cilin mazhoranca ishte zotuar se nuk do të pranonte asnjë shkresë që mban firmën e ish-kryeministrit.

Debatet dhe kaosi i krijuar në Kuvend çuan deri në mbylljen e seancës dhe përjashtimin e ish-kryeministrit Sali Berisha. Nga ana tjetër, grupi i Alibeajt njoftoi se do të kërkojë shkarkimin e Lindita Nikollës.

Kërkesa e deputeteve të opozitës për mocion me debat me kreun e qeverisë pas kalvarit procedural, u realizua në seancën e 2 marsit, ku kryeministri Edi Rama mbajti një fjalim të gjatë, ndërsa e quajti mocionin me debat për çështjen “McGonigal” më absurdin në historinë e Kuvendit shqiptar.

Kuvendi i hap rrugë arrestimit të Ahmetajt dhe Berishës

Kuvendi i Shqipërisë gjatë 2023 u përball me dy kërkesa të SPAK-ut për heqjen e imunitetit të deputetëve Arben Ahmetaj dhe Sali Berisha.

Në seancën parlamentare të 14 korrikut me 117 vota pro, asnjë kundër e tri abstenime, Kuvendi i hapi rrugë arrestimit të ish-zv/kryeministrit Arben Ahmetaj dhe kontrollit të banesës. Si rrallëherë në seancën e posaçme plenare, PS e PD bashkuan votat për t’i dhënë dritën jeshile SPAK-ut për të kërkuar në GJKKO prangosjen e ish-zv/kryeministrit dhe kontrollit të banesës së tij. Kartonëve jeshilë iu bashkua e gjithë qeveria. Ndërsa nuk pati asnjë votë kundër, 3 deputetë të opozitës, Fatmir Mediu, Vangjel Dule dhe Agron Duka abstenuan.

Seancës për dhënien e autorizimit SPAK-ut për arrestimin e ish-numrit 2 të qeverisë së tij, iu bashkua edhe kryeministri Edi Rama. Kur opozitarët mbajtën fjalën, ai zgjodhi të largohej, për t’iu bashkuar seancës vetëm për të votuar pro së bashku me 9 ministra të kabinetit të tij qeveritar.

Ndërsa të enjten e fundit të dhjetorit Parlamenti miratoi kërkesën e Strukturës së Posaçme Antikorrupsion (SPAK) për të marrë autorizim për arrest shtëpie ose me burg për ish-kryeministrin Sali Berisha. Deputetë mbështetës të Berishës hodhën flakadanë në sallën ku u zhvillua votimi dhe bllokuan foltoren me karrige.

Megjithatë kjo nuk u bë pengesë për mazhorancën që të votonte heqjen e imunitetit të deputetit më të vjetër nga radhët e opozitës. Në këtë seancë nuk morën pjesë deputetët e opozitës të cilët përkrahin Lulzim Bashën, kreun e PD-së vulës.

Ndërkaq ish-kryeministri Berisha refuzoi të merrte fjalën para votimit për heqjen e imunitetit të tij parlamentar. Ai iu bashkua protestës së paralajmëruar të mbështetësve të tij jashtë Parlamentit ku mbajti fjalën e tij teksa e quajti vendimin e Parlamentit "antikushtetues.”

Viti zgjedhor

Viti 2023 ishte një vit zgjedhor, ku shumë deputetë hoqën dorë nga mandati i tyre për të garuar në zgjedhjet e 14 majit për pushtetin vendor. Më 27 mars, 5 deputetë, 3 nga Partia Demokratike dhe 2 nga Partia Socialiste hoqën dorë nga mandati i deputetit për shkak të kandidimit të tyre në zgjedhjet vendore të 14 majit. Bëhet fjalë për Luçiano Boçin, Belind Këlliçin dhe Zef Hilën nga PD, ndërsa Benet Beci dhe Besjan Ajazi nga radhët e socialistëve./ CNA





Lajmet e fundit nga