web counter
LEXO PA REKLAMA!

SHKARKO APP

App Store
Google Play

E fundit!

x

Nisma ligjore e propozuar nga PS-ja/ Manja: Nuk cenon pavarësinë e sistemit të drejtësisë

16 Shkurt 2026, 09:22, Politikë CNA

Nisma ligjore e propozuar nga PS-ja/ Manja: Nuk cenon pavarësinë e

Kryetari i Komisionit të Ligjeve, Ulsi Manja, ka prezantuar në mbledhjen e Grupit Parlamentar të PS-së nismën ligjore të propozuar nga kjo forcë politike për ndryshime në Kodin e Procedurës Penale.

Manja ka theksuar gjatë fjalës së tij se ndryshimet e propozuara nuk kufizojnë kompetencat e prokurorisë dhe gjykatës dhe nuk cenojnë pavarësinë e drejtësisë.

Gjithashtu u shpreh se kjo nismë ligjore nuk prek masat shtrënguese dhe nuk ndryshon kriterin e aplikimit të tyre.

"Cili ka qenë qëllimi i projektligjit? Garantimi i funksionimit normal të institucioneve më të larta të shtetit duke ruajtur të paprekura kompetencat e prokurorisë. Ndryshimi nuk synon të kufizojë juridiksionin penal dhe as të krijojë paprekshmëri individuale.

Dua të bëjmë të qartë dallimin ndërmjet masave. Është e rëndësishme të bëhet me dije se kodi i procedurës penale bën një dallim të qartë mes masave shtrënguese dhe masave ndaluese. Masat shtrënguese janë masa sigurimi personal që kufizojnë lirinë fizike të individit. Këto masa prekin lirinë personale dhe vendosen vetëm me vendim gjykate. Masat ndaluese kanë karakter funksional dhe konsistojnë në pezullimin e ushtrimit të një detyre apo shërbimi publik. Ndikojnë drejtpërdrejt në ushtrimin e një funksioni të shtetit.

Ndryshimi që ne propozojmë nuk prek strukturën e masave shtrënguese, nuk ndryshon kriterin e aplikimit të tyre dhe nuk cenon kompetencën e gjykatës për caktimin e tyre sipas ligjit. Ndërhyrja që ne propozojmë ka natyrë procedurale dhe nuk përbën zgjerim të imunitetit kushtetues të zyrtarëve. Nuk i prekim dispozitat kushtetuese që rregullojnë imunitetin. Subjektet që përfshijmë te ky ndryshim mbeten të hetueshme. Gjykata ruan kompetencën për të vendosur masa sigurimi personal. Parimi i proporcionalitetit respektohet, pasi vetëm rregullon mënyrën e aplikimit të një mase të caktuar ndaj funksioneve të nivelit kushtetues. Siç e ka mbajtur qëndrimin Komisioni i Venecias, pezullimi nga detyra është ndërhyrje tërthortë e pushtetit gjyqësor në pushtetet e tjera, çka çon në një shkarkim 'de facto' të një funksionari publik. Projektligji nuk e cenon pavarësinë e prokurorisë dhe gjykatave. Nuk cenohet ndjekja penale apo gjykimi penal. Organet e drejtësisë vijojnë të ushtrojnë të drejtat e tyre në përputhje me Kushtetutën.

Shtyllat kryesore të shtetit në Shqipëri nisin me deputetët e Kuvendit, Presidentin, Avokati i Popullit, Kryeministrin, zëvendëskryeministrin e ministrat, anëtarët e Gjykatës Kushtetuese dhe KLSH-së. Këto janë bartësit e këtyre institucioneve që kemi parashikuar që të mos pezullohen nga gjykatat, në nismën tonë. Ndryshimi që ne propozojmë nuk zgjeron imunitetin kushtetues, nuk cenon pavarësinë e drejtësisë dhe nuk kufizon kompetencat e prokurorisë dhe gjykatës. Do të kërkojmë të futet në procedurë parlamentare, me shqyrtimin fillimisht në Komisione dhe më pas në Kuvend", u shpreh Manja. /CNA





Lajmet e fundit nga