Nisma ligjore e PS-së/ Kaso: Operacion politik për një Kryeministër të paprekshëm

16 Shkurt 2026, 19:27, Politikë CNA

Nisma ligjore e PS-së/ Kaso: Operacion politik për një

Deputeti demokrat, Ivi Kaso e ka cilësuar ndryshimin e propozuar nga Partia Socialiste në Kodin e Procedurës Penale jo thjesht si një ndërhyrje teknike, por si një operacion politik.

Përmes një postimi në rrjetet sociale, Kaso thekson se kjo nismë synon vendosjen e një mburoje ndaj kryeministrit dhe kupolës qeveritare përballë drejtësisë.

Sipas demokratit, Shqipëria nuk ka nevojë për një kryeministër të paprekshëm, pasi vendit i duhen më shumë se kurrë institucione të forta dhe drejtësi e lirë nga presioni politik.

“Ndryshimi i propozuar në Kodin e Procedurës Penale nuk është ndërhyrje teknike. Është një operacion politik për t’i vendosur një mburojë Kryeministrit dhe kupolës së qeverisë përballë drejtësisë.

Kur Edi Rama deklaron se pezullimi i zyrtarëve të lartë përbën “ndërhyrje në territorin kushtetues të pushtetit ekzekutiv”, ai në fakt po shpall një doktrinë të rrezikshme: se ekzekutivi është territor i paprekshëm nga mekanizmat e kontrollit.

Kjo bie ndesh me çdo parim të ndarjes së pushteteve dhe me vetë thelbin e Reformës në Drejtësi.

Propozimi për të përjashtuar nga masa e pezullimit Presidentin, Kryeministrin, zëvendëskryeministrin dhe ministrat krijon një kastë të privilegjuar zyrtarësh që, edhe nëse hetohen për vepra penale, vazhdojnë të qëndrojnë në detyrë pa asnjë kufizim.

Pezullimi nuk është dënim. Është masë mbrojtëse për integritetin e hetimit. Heqja e tij është sinjal i qartë se pushteti kërkon të qëndrojë mbi ligjin.

Kjo nismë vjen në një moment kur hetimet ndaj zyrtarëve të lartë, për çështje korrupsioni madhor më së fundmi po bëhen realitet.

Ndryshimi i rregullave të lojës, në mes të procesit hetimor, është gjithçka përveçse reformë – është tentativë e pastër për të shpëtuar kokën, atë të Belindës sot dhe të shefit të saj nesër kur t'i trokasë drejtësia te dera.

Shqipëria nuk ka nevojë për një Kryeministër të paprekshëm. Sot, më shumë se kurrë, ajo ka nevojë për institucione të forta dhe drejtësi të lirë nga presioni politik!”,-shprehet Kaso./CNA