Rama: Nëse ish-krerët e UÇK-së varrosen për së gjalli, atëherë të arrestohen edhe Bill Klinton e Tony Blair

16 Shkurt 2026, 13:27, Politikë CNA

Rama: Nëse ish-krerët e UÇK-së varrosen për së

Kryeministri Edi Rama i ka cilësuar prokurorët e procesit gjyqësor të ish-krerëve të UÇK-së në Hagë si instrumente të një gjykate më politike se gjykatat e Serbisë.

Rama e cilësoi të gjithë procesin gjyqësor si një katastrofë për Europën demokratike dhe Perëndimin.

Ndër të tjera, Rama duke ironizuar procesin, u shpreh se nëse katër ish-krerët e UÇK-së dënohen, atëherë duhet të arrestohet edhe Bill Klinton, Tony Blair apo kryeministrat e vendeve që u dhanë dritën jeshile bombardimeve.

“Ata prokurorë nuk janë thjesht idiotë, por janë instrumente të një gjykatë edhe më politike sesa gjykatat e Serbisë në raport më Kosovën. Me ligjet e kohës, kur ka ndodhur lufta. Drejtësia ndërkombëtare e financuar nga shtetet demokratike, që për turpin e tyre vazhdojnë ta ndjekin me indiferencën më të madhe gjithë këtë katastrofë për Europën demokratike.

Kjo bën që ne sot të ngremë një pikëpyetje për veten tonë se çfarë mund dhe duhet të bëjmë. Kjo është katastrofë për perëndimin demokratik, të cilin Kosova e testoi, dhe Perëndimi e kaloi testin. Por nëse sot nuk e kalon dhe merr përsipër varrosjen për së gjalli të këtyre 4 njerëzve të pafajshëm dhe duke lënduar si mos më keq Kosovën, atëherë ky mbetet problem shumë i madh. Kjo është pengmarrje për arsye politike, të atyre forcave që kanë dashur të barazojnë, dy gjëra të pabarazueshme: dhunën etnike të një makinerie lufte tërësisht fashiste dhe luftën çlirimtare të një mobilizimi popullor. Ka diçka tjetër ende më të rëndë. Nëse ata të katërt do të varrosen për së gjalli për luftën dhe çfarë ka ndodhur, atëherë duhet të arrestohen Bill Klinton, Tony Blair, kryeministrat e vendeve që u dhanë dritën jeshile bombardimeve. Ajo që po ndodh është shumë e rëndë dhe për ato që po ndodh, duhet të flasim e të shkruajmë libra, por mbi të gjitha duhet të gjejmë mënyrën të veprojmë. Nuk e kam përgjigjen se si, por bashkërisht të dyja shtetet tona mund ta gjejnë përgjigjen. T’i provojmë që të gjitha”, tha Rama. /CNA