web counter
LEXO PA REKLAMA!

SHKARKO APP

App Store
Google Play

E fundit!

x

Nga paratë e drogës te arrestimi i Veliajt/ Deklaratat e Arben Ahmetajt nga arratia

27 Mars 2025, 12:53, Politikë CNA

Nga paratë e drogës te arrestimi i Veliajt/ Deklaratat e Arben

“Ai që dikur ishte numri dy”. Kështu titullohet intervista e gjatë dhe ekskluzive e ish-zëvendëskryeministrit dhe ish-ministrit të Financave, Arben Ahmetaj, me gazetarin e njohur holandez, Vincent W.J. van Gerven Oei.

Në këtë intervistë, Arben Ahmetaj ndalet gjatë në tri çështje: paratë e drogës në ekonominë shqiptare, aksesin politik të organizatave kriminale dhe arrestimin e kryebashkiakut të Tiranës, Erion Veliaj.

I pyetur nëse ka qenë në dijeni të raporteve të shumta për rolin e parave të drogës në ekonominë shqiptare, gjatë asaj periudhës kur sapo u emërua në detyrë, Ahmetaj deklaroi se në ato vite lidhej më së shumti me pastrimin e parave që kalojnë nga sektori i ndërtimit. Ai shtoi se kjo vihet re edhe nga ndërtimet e vazhdueshme dhe kullat në Tiranë.

“Ky element lidhet me pastrimin e parave, i cili më së shumti kalonte nëpër kanalet e ndërtimit. Sot në Tiranë ka 64 mijë apartamente bosh dhe ende sheh kulla që po ndërtohen. Si mundet të përdoret ndërtimi si gjenerator, ndërkohë që ka 64 mijë apartamente bosh? Me çfarë parash financohet kjo, kur përqindja e kredive bankare është afër një shifre? Pastrim parash? Ky nuk është zhvillim; kjo është një ekonomi në hije që përfiton njerëzit dhe politikanët që lidhen me këtë fluks pastrimi parash”,-tha Ahmetaj.

I pyetur nëse ka parë pjesëtarë të krimit të organizuar në zyrat e Kryeministrit, Ahmetaj devijoi nga një përgjigje e drejtpërdrejtë, por u shpreh se ka hije dyshimi, pasi sipas tij, gjithmonë për tenderët fitues jepet buxhet maksimal dhe ofrohet disponueshmëria në shkallën më të lartë.

“Sot ka një hije pas çdo projekti në Shqipëri, çdo tenderi. Shumë rrallë ka një proces të drejtpërdrejtë. Shikoni ofertat fituese të tenderit: gjithmonë 98, 99% e buxhetit maksimal të disponueshëm. Si mund të jetë? Ku tjetër mund ta gjeni këtë? Askund. Projektet e infrastrukturës, rrugëve, energjetikës, ujit, projekteve komunale… Të gjithë e dinë këtë, është dijeni publike tashmë edhe për shqiptarin më të thjeshtë e të zakonshëm”,-deklaroi Ahmetaj.

Sa i përket pyetjes se si i sheh zhvillimet e ditëve të fundit në Shqipëri, me një kryetar bashkie të  arrestuar e në burg, si Erion Veliaj, Ahmetaj e konsideroi si teatër dhe akuzoi për këtë kryeministrin Edi Rama.

Nga paratë e drogës te arrestimi i Veliajt/ Deklaratat e Arben

“Ky është totalisht një teatër i Ramës. Ata në fakt mund edhe ta hetojnë atë ndërsa ai është jashtë, por jo si kryetar bashkie. Nuk mund të qëndrojë në detyrë ndërkohë që është duke u hetuar dhe akuzuar. Në të njëjtën kohë, nuk jam dakord me qëndrimin e Erionit për të sulmuar prokurorët dhe familjet e tyre”,- u shpreh Ahmetaj.

Ish-zëvendëskryeministri dhe ish-ministri i Financave, Arben Ahmetaj, u arratis më 7 korrik 2023, pasi mësoi se SPAK-u i kishte kërkuar Kuvendit autorizim për arrestimin e tij. Nga ai moment e në vijim, Ahmetaj ka dhënë disa intervista ku ka zbuluar disa nga prapaskenat e politikës./CNA





Lajmet e fundit nga