Në garë për kryebashkiak të Tiranës/ Del një tjetër kandidat që synon të sfidojë Veliajn

15 Nëntor 2022, 13:47, Politikë CNA

Në garë për kryebashkiak të Tiranës/ Del një

Në një takim të zhvilluar me disa dhjetëra qytetarë të Tiranës dhe me anëtarë e dashamirës të LRE, Arian Galdini ka shpalosur synimin e tij për të qenë kandidati i kësaj partie për kryetar bashkie i Tiranës.

Ideja dhe synimi i Galdinit për të kandiduar për Bashkinë e Tiranës vijnë herët në kohë që në zgjedhjet lokale të 30 qershorit 2019.

Por edhe pse Arian Galdini asokohe ia doli mbanë të mblidhte firmat e nevojshme mbështetëse të mbi 3200 qytetarëve, KQZ e njëanshme e PS për shkak të mospjesëmarrjes së Opozitës në zgjedhje, nuk ia lejoi padrejtësisht dhe arbitrarisht Galdinit që të konkurronte.

Kësaj radhe duket se Kryetari i LRE e ka vendosur ta ripropozojë kandidimin e tij duke synuar konkurrimin për Bashkinë e Tiranës.

Gjatë takimit në Hotel "Tirana International", Ejona Mema - NënKryetare e LRE deklaroi se: "LRE nis fushatën sensibilizuese për mbledhjen e 3500 firmave mbështetëse të qytetarëve të Tiranës sepse LRE dëshiron që kandidati i saj të jetë kandidati i qytetarëve."

Ndërsa kryetari i LRE për Tiranën z. Genti Sinani u shpreh se: "Ne si LRE jo vetëm do të synojmë të kemi kandidatin tonë për kryetar bashkie me mbështetjen e firmave të qytetarëve, por edhe një listë dinjitoze të LRE Lëvizja e Re për këshillin bashkiak të Tiranës."

Më tej kryetari i LRE z. Arian Galdini e mori fjalën duke shpalosur edhe synimin e tij për të kandiduar për kryetar bashkie i Tiranës si edhe parimet bazë të Projektit të tij Programatik për këtë kandidim.

Në garë për kryebashkiak të Tiranës/ Del një

"Ne si LRE jemi një parti e re politike. Vetëm 2 vjet histori kemi, por ama kemi një histori unike. Ne nuk jemi parti si çdo parti tjetër konvencionale. Ne nuk kemi lindur as parti e ish-komunistëve e as si parti e ish-sigurimsave. Ne nuk kemi lindur as si Parti e Ramiz Alisë, e as si e Nexhmije Hoxhës, as si e Institutit të Studimeve Marksiste Leniniste, e as si parti e Byrosë Politike, as si parti e Xhorxh Sorosit e as si parti e Erdoganit, as si parti e Gylenit e as si parti e Shërbimeve Sekrete, as si parti e UDB e as si parti e Asfalisë Greke, as si parti e Oligarkëve, e as si parti e krimit të organizuar, as si parti e Sali Berishës, e as si parti e Fatos Nanos, as si parti e Ilir Metës, e as si parti e Edi Ramës, as si parti e Lulzim Bashës, e as si parti e Erion Veliajt.

Ne kemi lindur si parti e qytetarëve të thjeshtë, të ndershëm dhe të papërlyer. Asnjë ish-zyrtar, asnjë ish-drejtues, asnjë ish-ofiqar, asnjë ish-deputet, asnjë ish-kryetar bashkie, asnjë ish-drejtor, asnjë i korruptuar apo i inkrimimuar, i asnjë partie, i asnjë pushteti, as i majtë e as i djathtë, nuk është në LRE. Janë të dekurajuar, të gjithë ish-ët që janë me ngarkesa korrupsioni apo ligjshkeljeje, madje jo vetëm të dekurajuar, por janë të ndaluar që të vijnë në LRE.

Ne në LRE duam e pranojmë vetëm njerëz të ndershëm e të papërlyer. Prandaj edhe hyrjen tonë në zgjedhje ne e kemi si partia e qytetarëve të ndershëm e të thjeshtë me kandidatët e qytetarëve të mbështetur nga firmat e qytetarëve. Prej sot ne si LRE do të përpiqemi të mbledhim 3500 firma mbështetëse të qytetarëve që në garën për Bashkinë e Tiranës të jetë edhe alternativa e qytetarëve edhe kandidati i qytetarëve. Do të bëjmë gjithë sa mundemi që ti mbledhim 3500 firmat. Nëse ia dalim mbanë, atëherë unë do të jem kandidati i LRE dhe i qytetarëve për Kryetar Bashkie i Tiranës..." - deklaroi Arian Galdini./CNA.al