web counter
LEXO PA REKLAMA!

SHKARKO APP

App Store
Google Play

E fundit!

x

Lirimi i protestuesve/ Noka: Arrestimet ishin të paligjshme

24 Dhjetor 2025, 14:36, Politikë CNA

Lirimi i protestuesve/ Noka: Arrestimet ishin të paligjshme

Sekretari i Përgjithshëm i Partisë Demokratike, Flamur Noka, ka komentuar lirimin e protestuesve të arrestuar, duke deklaruar se ata kanë protestuar kundër korrupsionit, krimit dhe lidhjeve të tij me pushtetin.

Në një prononcim për mediat, Noka tha se qytetarët u akuzuan padrejtësisht si destabilizues, ndërkohë që sipas tij, qeveria është ajo që po destabilizon vendin.

Ai akuzoi drejtpërdrejt kryeministrin Edi Rama dhe bashkëpunëtorët e tij për lidhje me individë dhe grupe kriminale.

“Këta qytetarë kanë dalë për të protestuar kundër korrupsionit qeveritar, krimit dhe lidhjeve të tij me pushtetin. Ndërsa protestuesit përballeshin me arrestime, individë të përfshirë në afera të rënda lëviznin lirshëm me makinën e kryeministrit”, u shpreh Noka, duke shtuar se ka publikuar prova audio dhe video për këtë pretendim.

Noka theksoi se protestat e nisura më 22 do të vijojnë deri në largimin e qeverisë aktuale, të cilën e cilësoi si burimin e vetëm të destabilizimit të vendit. Ai deklaroi gjithashtu se vendimi i gjykatës për lirimin e protestuesve vërteton, sipas tij, paligjshmërinë e veprimeve të policisë.

“Gjykata vendosi se arrestimi ishte i paligjshëm. Nuk kishte prova apo fakte, por vetëm presion ndaj qytetarëve që protestojnë”, tha Noka, duke shtuar se zgjidhja e vetme për situatën aktuale është krijimi i një qeverie teknike.

Sipas tij, protestat do të vazhdojnë deri në realizimin e këtij qëllimi dhe deri në, siç u shpreh ai, “pastrimin e Shqipërisë nga korrupsioni dhe krimi”./ CNA





Lajmet e fundit nga