E fundit!

15:57 Aktualitet

VIDEO-Vrasja në Maliq, Lamallari “zbarkon” në Policinë e Korçës

Ministri i Brendshëm Besfort Lamallari ka zbarkuar në Drej...

Kuvendi i Parë për LRE-në/ Arian Galdini zgjidhet kreu i partisë

20 Qershor 2023, 13:22, Politikë CNA

Kuvendi i Parë për LRE-në/ Arian Galdini zgjidhet kreu i

Partia Lëvizja e Re zhvilloi në datën 17 qershor, Kuvendin e Parë Zgjedhor ku morën pjesë 523 delegatë nga e gjithë Shqipëria dhe Diaspora, të cilët zgjodhën organet drejtuese të kësaj partie, Asamblenë Kombëtare dhe Kryetarin e LRE-së.

Kuvendin e Parë Zgjedhor të LRE-së e nderuan me pjesëmarrjen e tyre si edhe e përshëndetën z. Lutfi Haziri - Zv.kryetar i parë i LDK - Lidhjes Demokratike të Kosovës si edhe znj. Jola Hysa - Sekretare e Marrëdhënieve me Publikun e PDSH.

Në Kuvendin e LRE u rikonfirmua se kjo parti është një parti opozitare që i përket të djathtës humane.

Kuvendi i Parë Zgjedhor i LRE zgjodhi përveç, Asamblesë Kombëtare dhe Kryetarit të LRE, edhe 2 nënkryetarët dhe Sekretarin e Përgjithshëm të LRE.

Kryetar i LRE u zgjodh Arian Galdini, nënkyetarë të LRE u zgjodhën Majlind Mejdani dhe Gent Sinani.

Sekretar i Përgjithshëm i LRE u zgjodh Jani Nano.

Kryetari i zgjedhur i LRE Lëvizja e Re Arian Galdini u shpreh se:

“Më në fund, prej datës 17 qershor 2023, LRE nuk ka më drejtues themelues dhe nismëtarë, por Drejtues të Zgjedhur me votën e qindra delegatëve.

Drejtuesit e LRE përfaqësojnë vullnetin e qindra delegatëve zgjedhës, e kjo ua rrit në nivele madhore përgjegjësinë dhe detyrimin e misionin për ta çuar LRE drejt suksesit. Kuvendi i Parë Zgjedhor i LRE ishte sukses i plotë dhe mision i përmbushur tashmë.

Mirënjohje pafund për të gjithë. Prej këtij Kuvendi - vijoi Galdini - ne si LRE theksojmë se jemi parti opozitare me të majtën dhe qeverisjen e majtë si edhe një përpjekje serioze e një komuniteti qytetarësh të thjeshtë, të ndershëm dhe të papërlyer për t'i dhënë një energji të re opozitarizmit dhe të djathtës në Shqipëri. Ne nuk jemi fraksion e as parti e ndarë prej askujt. Ne si LRE jemi një komunitet politik që e shohim dhe po e ndërtojmë grupimin tonë politik si një vlerë të shtuar dhe krejt të qartë në identitetin tonë si parti politike e djathtë dhe opozitare. Ne jemi e djathta humane, pro familjes, pro jetës, pro SHBA, pro Reformës në Drejtësi, pro biznesit e mbi të gjitha pro dinjitetit njerëzor. Pas këtij Kuvendi ne si parti politike nuk i druhemi më asnjë sfide identitare.

Ne dimë të ecim në korsinë tonë krejt të vetmuar, por dimë edhe të bashkepunojmë. Nuk i trembemi asnjë bashkëpunimi ndëropozitar sepse ne kemi identitetin tonë si parti e nuk pranojmë asnjë bashkëpunim asimilues apo zhvlerësues.

Jemi të hapur e madje e inkurajojmë bashkëpunimin dhe bashkëkoordinimin e madje edhe bashkimin opozitar por jo me taktika e mendësi asimiluese apo zhvlerësuese. Nëse tentohet asimilimi apo zhvlerësimi, ne jemi të gatshëm edhe të udhëtojmë krejt vetëm e në korsinë tonë. Por parimisht jemi pro bashkëpunimit e madje inkurajojmë bashkimin e Opozitës.”