Konfirmohet CNA: Basha me parti të re ose në garë në koalicion me parti të tjera

13 Qershor 2024, 21:34, Politikë CNA

Konfirmohet CNA: Basha me parti të re ose në garë në

Lulzim Basha, burimi i fotos: LSA

CNA zbuloi skemën e përgatitur nga Lulzim Basha, i cili pas vendimit të Gjykatës së Apelit për vulën, të cilën ia kaloi Sali Berishës, tashmë është vënë në lëvizje për të krijuar një koalicion apo një parti të re.

Lajmin e CNA e ka konfirmuar ushtari besnik i Lulzim Bashës, Roland Bejko. Gjatë një interviste në A2Cnn, Bejko dha variantin e partisë së re ose kolacionin me parti të tjera.

“Na ka hapur një problem shumë të madh, se do të vazhdojë çdo gjë nga e para. Nëse do të bësh formacion politik do të depozitosh në gjykatë sipas ligjit, statutin dhe çdo gjë tjetër që kërkon ligji dhe duhet të marrësh edhe emrin, edhe logon e re.Strukturat e formacionit tonë politik të vendosin rrugën ku do të ecim. Varianti i parë është një subjekt i ri politik. Ka disa zëra që të shkojmë si fraksion brenda partisë së Berishës, në statut e kanë edhe ata. Në Shqipëri nuk ka përvojë. I vihet një emër fraksionit dhe në fletën e votimit vihet me përqindje.

Dhe në perëndim shumë pak parti e kanë fraksionin. Ka dhe një variant që të mblidhet një tryezë me të gjitha partitë e djathta dhe të merrte një vendim. Ne na bashkojnë më shumë gjëra me partitë e tjera që janë jashtë Berishës.

Me zotin Lapaj kemi të njëjtin objektiv, po kështu edhe parti të tjera; Endri Shabani dhe Dash Shehi. Negociatat nuk kanë nisur.

Nesër në orën 14: 00 kemi një takim të kryesisë dhe kolegjit të kryetarëve dhe do të vendosim shumë shpejt. Do të dalim me një qëndrim të qartë se cili do të jetë orientimi. Lëvizje individuale kanë nisur”, tha Bejko.

CNA raportoi se Basha dhe të tijtë po përgatiteshin të kishin një koalicion me disa parti të vogla dhe nëpërmjet vulës së tyre apo hapësirave ligjore që kanë të krijojnë një grupim politik për të dalë në zgjedhjet e ardhshme parlamentare.

Tashmë pa vulë dhe pa logon në siglën e PD-së, por me një hap të ri që do të jetë një grupim politik opozitar, ashtu siç shpesh e ka artikuluar Luli.

CNA mësoi nga burime zyrtare te njerëzit e Bashës se ky ka qenë një hap i parapërgatitur dhe i mirëmenduar në rast se gjykata do të jepte një vendim si ky i sotmi që e le pa vulë, pa sigël dhe pa logo Lulzim Bashën dhe të tijtë, një grup individësh të cilët menduan se një pakicë mund të rrëmbente vulën, siglën dhe logon e një partie./ CNA