“Socialist i papunë”/ Ylli Dylgjeri “nuk kursehet” ndaj PS-së: Është partia e oligarkëve dhe krimit

26 Korrik 2022, 21:18, Politikë CNA

“Socialist i papunë”/ Ylli Dylgjeri “nuk kursehet”

Gazetari dhe publicisti Ylli Dylgjeri

Gazetari dhe publicisti Ylli Dylgjeri, ka sulmuar mbrëmjen e sotme Partinë Socialiste, gjatë një takimi me kreun e PD-së, Sali Berisha dhe me një grup intelektualësh.

Dylgjeri tha se ai është një socialist i papunë që ka mbetur pa parti, pasi ngriti akuzat se sot PS është partia e oligarkëve, e PPP, koncesioneve dhe e krimit të organizuar.

Publicisti deklaroi se ashtu siç Berisha është shpallur “non grata” nga SHBA-të dhe Britania, edhe ai është shpallur “non grata” nga PS.

“Jam publicist sot, por në rrethanat e një të papuni i cili kërkon alternativën. Jam i papunë socialist. Kam mbetur pa parti. Nuk ka sot Parti Socialiste. PS është partia e oligarkëve, e PPP, koncesioneve, e krimit të organizuar. Sot kemi një PD të qendrës që e drejton Berisha, kemi një LSI të djeshme që sot është Parti e Lirisë, që është parti sovraniste që po kalon në popullore dhe nuk kemi më Parti Socialiste. Unë jam sërish 'non grata'. Doktor nuk jeni vetëm ju 'non grata', do ketë edhe të tjerë këtu. Publiku kërkon alternativën, Mbretëria e Bashkuar na sjell 'non grata'-n. Pyetja ime: Është mike, apo jo mike kjo qeveri? Pse? Sepse, nëse Mbretëria e Bashkuar do të na ndihmonte, duhet të na ndihmonte me projekte për të goditur mafien dhe krimin.

Me një 'non grata' nuk ndihmon askënd pasi jemi të gjithë të tillë. Kur duan të ndihmojnë shtete, ndihmojnë me projekte. Të tillë e bëri në Hong Kong, kam qenë atje dhe kam parë projektin britanik se si pas viteve ’90 britanikët morën përsipër, në kushtet tona ishte Hong Kongu, me drogë, dhe e nxorën atë vend në ‘dragonjtë’ e Azisë. Alternativa ishte kontroll shteti me grada policore. Morën 900 djem dhe vajza të ekselencës u dhanë grada dhe i futën në kontroll. Atje ku konstatohej se ishte shkelja në ndërtim, në market, apo kudo, ishte titull ekzekutiv, bllokohej menjëherë dhe shkatërrohej godina, objekti, nuk kishte burokracia. Policia ka punë boll. Krimi është sofistikuar dhe këto specialistë janë në gjendje të hyjnë në bërthamën e tij”, theksoi Dylgjeri./ B.A. - CNA.al